2015年4月22日 星期三

借網救亡 盛女橋玩到爛 大台搵司徒夾帶拍真人騷救亡 [FACE - 413] MF,



司徒夾帶(陳學鳴)同 Miss Hunny將會組成一隊參加真人騷,但兩人已簽咗保密協議,唔講得會拍啲乜。

真面目

借網救亡 盛女橋玩到爛 大台搵司徒夾帶拍真人騷救亡

玩過《盛女》玩過《沒女》,大台編導岑應話就話成功製造話題,但後遺症係俾觀眾狂插,搞到真人騷節目形象大跌!

仲搞男男女女大兜亂實在太 out!據知岑應今年秘密轉玩 YouTuber真人騷,搵咗司徒夾帶(陳學鳴)、 Miss Hunny、學舌鳥同一字馬等進行比賽,贏咗會有獎金獎品添。之但係司徒夾帶曾經力撐王維基嘅港視,又明寸過大台,今次真人騷會唔會又玩出火?剝定花生先!

連續拍咗 3年《盛女》,整容、做媒、騙子導師等等真係睇到冇晒胃口!所以《盛女》系列監製岑應都轉軚,利用分分鐘紅過大台明星仔嘅 YouTuber嚟救亡,開拍真人騷。首選當然係 YouTube界最響朵嘅司徒夾帶、 Miss Hunny,仲有喺《百萬窮富翁》飾演陳生兼《公屋》導演 Ronnie Chau、扮劉華去鳩嗚嘅學舌鳥、同埋反水貨客嘅一字馬。

睇個名單的確好踩界,司徒夾帶曾經拍片暗寸大台拍劇慳皮又明撐王維基,後三者就明撐佔中同反水貨,究竟岑應搞邊科?

真人騷上週已開始拍攝,而且非常保密,所有參加者要簽保密協議,不得向外提半隻字,亦唔可以喺網上媒體透露任何拍真人騷嘅蛛絲馬跡。而節目性質屬比賽形式,各個單位要自己度橋拍短片,大台孭起使費及全程以真人騷形式紀錄,完成嘅短片會由觀眾投票選出冠軍,獲取獎金獎品。

據知各 YouTuber拍攝短片的題材並無限制,最後會唔會河蟹真係好難講!記者致電過幾位有份參加嘅 YouTuber,但全部截稿前未有回覆。高登仔話齋,留名等睇戲!

《盛女》編導岑應(中)搞咗 3年真人騷,反應好大,今年決定唔再玩素人,改玩 YouTuber。

《蘋果日報》圖片

司徒夾帶又明撐 HKTV,仲同王維基拍過短片恥笑大台拍劇求求其其:「香港有個台唔使錢㗎喎拍劇,喺自己啲廠呀、公園呀、樓下咁拍晒」

司徒夾帶最高點擊率係諷刺雞汁 May嘅乜姐有請,有成 75萬,如今參加大台節目,會唔會俾人河蟹呢?

學舌鳥有份

除咗司徒夾帶同 Miss Hunny,仲有 3個單位出演真人騷。

Ronnie

《公屋。居屋。私樓》導演,近期同司徒夾帶合演《百萬窮富翁》演陳生,又拍過《世伯》開黃傘撐佔中。

電視畫面

水貨客問題嚴重,一字馬曾拍片以讚揚水貨客手法,實質反內地客來港。

網上圖片

學舌鳥

學舌鳥喺《陳浩南教書篇》寸過慈母,又扮華仔唱〈日日去鳩鳴〉明撐佔中,大台唔通想招攬呢班 YouTuber洗佢哋腦?

網上圖片

《佬 Online》導演唔恨拍

香港仲有好多出名 YouTuber,如熊仔頭、女師傅、伍仔、 Ming仔、步飛、 Ashly、窮飛龍等等,雖然大台冇搵佢哋參加真人騷,但佢哋又想唔想拍呢吓?

女師傅 Kimberly

睇公司決定,我就好易話為,我咩都做嘅!司徒夾帶都冇乜所謂嘅,佢又唔會與人為敵。

熊仔頭

聽過但冇搵我,我唔抗拒任何電視台,但有獎金獎品嘅話反而降低興趣,好似違反咗拍片原意。

步飛

如果搵我都有興趣嘅,我又冇鬧過大台,不過呢排冇時間喎。

《盛女》感情亂

以往《盛女》系列唔只有話題,參加者同導師喺節目後都有啲感情上嘅發展。

《求愛》 Rocky上年傳出同「終極沒女」 Meggie撻着,女方聲言因為 Rocky而重拾對男人嘅信心,唔排除會啪一聲喺埋一齊,真係天生一對呀!

Rocky

Meggie

Whitney

《求愛》最省鏡嘅 Whitney,閃電搭上媽模 Mia前夫莊家傑,又閃電結婚。但就俾 Mia爆男方離婚後冇畀錢一對仔女。

Queenie陳莉敏

人生教練 Queenie得到《求愛》參加者 Cyrus求愛成功,成為一 pair,總算叫撮合咗一對啦。

鍾意就快D Share啦!