掃呢頁CODE去手機

2015年5月21日 星期四

一個養全家 鄭容和 [壹週刊 - 1315] 鄭容和,M1,



CNBLUE同一班 FNC嘅同門藝人喺香港舉行一連兩場嘅家族騷,人氣最強依然係鄭容和,一出場 fans叫到拆天。

日韓到會

一個養全家 鄭容和

韓國娛樂圈嘅團隊意識好強,同一間唱片公司嘅藝人,直情好似一家人,唔似香港時不時就傳出邊個同邊個爭寵做一哥一姐的是非。

旗下有 CNBLUE、 FT Island等等人氣組合嘅唱片公司 FNC娛樂,喺香港舉行家族晒冷騷。除咗有兩隊大哥坐鎮之外,仲帶埋師弟妹 Juniel、 N.Flying及 AOA一齊嚟,有錢齊齊搵,以為人多勢眾好辦事,結果都係靠晒兩個大佬—— CNBLUE鄭容和同 FT Island李洪基,九成觀眾睇佢哋。睇嚟唱片公司想捧新人,要改朝換代都仲要等一段時間。

FT Island屁股要緊

其實開家族騷,一班師弟妹都係為兩隊大師兄暖場,唱咗個幾鐘,終於到 FT Island!主音李洪基風騷食住棒棒糖出場,大唱 3月推出嘅新碟歌,好似《 Pray》、《 Time To》等等,一向表現奔放嘅李洪基,喺台上跳個不停、跑來跑去,炒熱全場氣氛。多次來港嘅 FT Island,好識氹香港 fans,廣東話唔只「大家好」、「我愛你」咁行貨,李洪基更用廣東話同 fans講「我依家 pat pat唔痛」,原來佢之前因為生痔瘡而做咗兩次手術,估唔到咁都可以同 fans分享, band友真係無偶像包袱!之後仲用行動證明自己康復,唱足十首歌都係跳跳扎, fans應該信佢好番晒!

嚟香港齋開騷太唔符合經濟效益,梗係趁中間嘅空檔時間搵真銀,去剪個綵露個面, easy job!

鄭容和好識搞氣氛,走落台不得止,仲改歌詞話好愛香港,氹得 fans心花怒放。

FT Island低音結他手李在真不停笑李洪基 pat pat痛,搞到佢爆咗一句「 Shit!」,男人最痛算這種。

有別於其他家族騷, FNC各團嘅合作比較少,其中李洪基同 AOA成員 Yuna合唱兩首歌,已經帶來驚喜。

李洪基成日喺台上跳跳扎,舞台嘅爆發力非常強勁,唱功了得,令全場氣氛非常熱烈。

CNBLUE人氣最強

韓國人一向長幼有序,不過 CNBLUE可以壓過師兄 FT Island,成為最後一隊壓軸出場,證明喺香港人氣有幾強。 CNBLUE一出場以《 Coffee Shop》揭開序幕,平時官仔骨骨嘅鄭容和,表演嘅時候完全變成另一個人,換上 T恤牛仔褲嘅 band友打扮,一樣滿場飛,仲一度彈住結他走落台,同 fans近距離接觸! CNBLUE連續三年嚟到香港舉行演唱會,鄭容和今年更加喺香港舉行個人演唱會,對香港一啲都唔陌生,四位成員係講廣東話最好嘅一隊,不停話「好掛住大家」、「玩得開心啲」,真係特別有親切感。唱咗八首歌之後,再同家族其他成員一齊大合唱,一班男仔仲跟 AOA學跳扭腰舞,玩到癲晒!睇完兩日演唱會,最開心都係一班 fans,因為 FT Island又宣布,會喺 8月嚟香港舉行演唱會, fans想抖吓都無時間呀!

5月 15號係 CNBLUE成員宗泫嘅 25歲生日,一班兄弟姊妹同佢慶祝,佢仲開心到用個鼻嚟吹蠟燭!

AOA身為 FNC唯一一隊女團,跳舞呢啲粗重功夫就交俾佢哋做,仲要教無乜天分嘅師兄,真係辛苦晒。

AOA短裙誘惑

韓國唱片公司好興將所有藝人聚集一齊開家族騷,不過去海外做有難度,因為太大堆頭,製作費相應提高,門票賣得貴都無得賺,以往 SM Town( Super Junior所屬唱片公司)同 YG Family( BIGBANG所屬唱片公司)演唱會計劃都胎死腹中,只係得上年 JYP家族嚟過。 FNC Kingdom算揼本,今次巡迴 5月喺首爾開始,香港係第二站,之後仲會去到日本、台灣等地方。一連兩場嘅演唱會先由新進男團 N.Flying打頭陣,四位成員同師兄一樣,唔唱洗腦 K-Pop,行 band路線,努力用英文同 fans打招呼,誠意分大加!之後出場嘅係創作女歌手 Juniel,拎住結他自彈自唱 3首清新小品,大騷唱功! FNC入面唯一一隊跳舞女團 AOA,短裙仔、扭腰舞、典型 K-Pop歌,睇到佢哋先覺得自己係睇緊韓星演唱會,不過第一次嚟香港表演,學廣東話唔多標準,下次要練好啲喇!

Juniel喺香港無乜人識,創作女歌手喺香港唔容易走紅,更何況由韓國嚟?

AOA出道 3年,上年憑《 Miniskirt》一曲嶄露頭角,不過少女團體競爭激烈,要站穩陣腳仲需要多啲努力同運氣。

AOA最紅成員雪炫(中),最近同 CNBLUE宗泫拍電視劇而人氣急升,仲被稱為第二個秀智,女神二號有待觀察。

AOA主音草娥為師弟 N.Flying站台,一齊合唱,不過驕人身材似乎令小師弟好尷尬喎。

AOA嘅智珉展現 rapper方面嘅才華,同 N.Flying嘅 J Don有一個特別演出叫「 N. Project」,歌曲中仲有粗口,意識大膽。

鍾意就快D Share啦!