汪阿姐前日喺微博大晒同家英哥嘅甜蜜照，慶祝結婚6周年。生活美滿又keep得好，但從影50年之多，汪阿姐其實已經捱到周身傷。
有報導指，汪阿姐曾去骨科醫務所同專門治療脊骨神經痛嘅診所睇醫生，可能係受脊骨傷痛困擾。不過汪阿姐就澄清佢冇病，不過過勞退化就梗架喇，都唔係今日先有。70年代時，汪阿姐拍武打戲傷咗腰骨，之後佢狂練拉丁舞又搞到膝頭勞損，據知到依家都要定期做物理治療。
不過傷都唔緊，最令汪阿姐遺憾嘅係冇生過小朋友，佢09年喺台上公開講：「人點會冇遺憾！我都有遺憾，未生過BB，未同過小朋友溝通，真係好遺憾！」
