徐淑敏（Suki）同黃浩兩公婆一向鍾意全家出動，早前帶埋3個寶貝女、阿媽、家姐、外傭同保鏢，成隊兵咁去圓方睇《復仇者聯盟2》。
離開場仲有啲時間，Suki先去書店行個轉，嚟手就執咗十幾本美容同兒童書，去到櫃枱俾錢，店員向佢推介特價米妮公仔，細囡Isabella鍾意喎，即買！等細囡可以坐喺BB車度即刻玩！之後佢轉場去HMV買卡通碟，大女Vianna同二囡Renee就坐喺玩具區同其他細路一齊玩，好乖冇周圍走。
買完嘢，Suki去會合老公入場，不過因為細囡太細個唔俾入，要交由婆婆、外傭同保鏢照顧，Suki即刻母愛大發，錫咗一大輪先肯走。套戲其實得兩個幾鐘，分開一陣都咁唔捨得，真係孻女孻心肝。
