掃呢頁CODE去手機

2015年5月20日 星期三

熱力十足 首爾直擊 街頭暴曬 熱溶男神 金秀賢剝衫解暑 [FACE - 417 - 外地娛樂] 金秀賢,MF,



脫去外套後仍然熱到扁晒嘴,金秀賢忍唔住扯起件 tee乘涼。

真面目

熱力十足 首爾直擊 街頭暴曬 熱溶男神 金秀賢剝衫解暑

等到頸都長,金秀賢新劇《製作人》上星期終於播咗兩集。按韓劇慣例,新劇例牌邊拍邊播,《 FACE》上星期就飛到首爾直擊金秀賢拍攝實況,喺接近 30度高溫下,金秀賢要暴曬拍外景拍足 3小時,男神都頂唔順要除衫唞唞喇!

KBS新劇《製作人》播咗兩集,今次金秀賢唔再係高智慧外星人,而係飾演傻頭傻腦嘅電視台導演新仔,乜都唔識仲要第 1集就得罪上司孔孝真,搞到集集俾孔孝真指住嚟鬧,真係見者流淚!

《製作人》共 12集,播映同時亦喺首爾趕拍當中,上週四( 14日)及週日( 17日)劇組喺 KBS電視台大樓外拍外景,金秀賢心情好輕鬆,主動同工作人員躹躬打招呼又有講有笑,非常有禮貌;不過當日烈日當空接近 30度就令男神好辛苦,一到場就拎住把扇係咁撥,又要工作人員幫忙擔遮擋太陽,後來金秀賢終於頂唔住要除咗件外套,熱到拉起 tee唞涼添,好辛苦咁喎!

好彩劇集播出後收視都算唔錯,根據韓國 TNMS收視統計,《製作人》首集收視有 10.5%,成為當日同時段劇集收視第 1位,而第 2集收視則錄得 11.2%,但就輸咗畀另一套韓劇《讓女人哭泣》,但相信熱完身,隨着劇中的微妙四角關係,收視隨時仲有得繼續升㗎!

上週四( 14日)金秀賢趕拍《製作人》,着住外套喺外景場地跑嚟跑去,唔熱至奇

跑完之後休息咗一陣依然難敵太陽伯伯嘅關照,結果要脫去外套。

自備紙扇

金秀賢原來好怕熱,一到拍攝場地已自備紙扇,幾乎扇不離手,又係嘅,大熱天時拍戲係幾辛苦!

現場所見有成 6、 7個工作人員負責照顧金秀賢,等埋位時都要用大傘幫佢遮太陽。

遮陣護男神

《製作人》導演表民秀曾經拍過《 IRIS 2》和《咖啡情緣》等,首次同金秀賢合作。

攬實孔孝真

拍攝時有段小插曲,金秀賢同女主角企喺個好狹窄嘅空間,突然孔孝真退後一步,卻唔小心俾後面向前行嘅金秀賢拌倒腳,腳步不穩向後跌,好彩金秀賢好快手即刻扶住孔孝真至冇跌親咋。超能力呀!都敏俊返嚟喇!

好多星客串喎!

《製作人》係講電視台嘅故事,部分場景亦喺韓國電視台 KBS度拍攝,會客串嘅藝人都唔少㗎!好似第 1集已經有少女時代嘅分隊 TAETISEO出過場,嚟緊仲會有 2PM嘅 Nichkhun、 EXID嘅 Hani、趙權、張赫、 JYP、宣美、 WINNER嘅姜勝允同 Boyfriend嘅珉會客串添,上週四採訪當日,就見到 2NE1的 Dara在現場喇!

而大家都好關心全智賢會唔會出場,早前車太鉉喺記招就叫大家期待下,唔知係咪暗示全智賢會有份演出,係就好囉!

Dara( 2NE1)

TAETISEO

Nichkhun

Hani( EXID)

鍾意就快D Share啦!