不獲續牌嘅亞洲電視，員工不斷流失，至上月為止，亞視員工總數已由700多人，流失至得番500幾人。誠如亞視執董葉家寶所言，一直努力尋找新買家。日前《蘋果》已率先報道，指亞視本成功與一個山東財團新買家達成協議，並於本月初簽約，豈料亞視投資者王征臨門一腳拒簽，令員工好夢成空。葉家寶就表示:「傾到埋尾階段，睇吓呢一、兩日係咪成事，舉行員工大會係希望有好消息公佈。希望星期五左右有好消息公佈啦。」(新聞連結： http://bit.ly/1GijrZI )
今晨亞視前執董盛品儒於fb暗示亞視已有新買家，亞視發言人稱要等到今午盆菜宴才有宣佈。果然一如傳聞，葉家寶於盆菜宴開始前宣佈，昨晚已有新投資者簽買賣合約:「所以亞視有新轉機，有全新嘅希望。」全場興奮歡呼。葉家寶又表示於下周會正式宣佈細節:「新投資者已經承諾咗會做好亞視，大做亞視，將亞視作全方位多平台發展，成為亞洲文化傳媒，令亞視成為多媒體多功能嘅機構。」
此外，今日葉家寶戴咗條橙白嘅呔，佢話戴乜嘢顏色嘅呔就代表亞視前景，而今日呢條橙白色，就代表亞視前景一片光明。不過買家身份，葉家寶暫未透露。
|
鍾意就快D Share啦！
|
|
|