發哥甜蜜過夜妙計嚇窒祖兒
眨吓眼《東網巨星》App特備節目《我愛發哥》來到最後一集，並已於昨日播出，壓軸嘉賓是樂壇天后容祖兒！祖兒趁好機會邀請偶像周潤發行山，豈料發哥再出招，笑言上鳳凰山要過夜，並會留低她與男友劉浩龍在山上，嚇得祖兒O晒嘴，非常搞笑！而首集嘉賓謝安琪（Kay）剖白她愛《秋天的童話》後，竟獲老公張繼聰再次「求婚」？至於主角發哥笑言連續答了25集嘉賓的「難題」，講到口水都乾，下次再答可能要觀眾伸長條頸慢慢等！
身為樂壇一姐的祖兒雖然已有公開的男友劉浩龍，不過她對住發哥竟忍不住要「表白」：「我愛發哥……夠靚仔，鍾意發哥心地好，又親切，有求必應！」
發哥：「我夠鍾意你喂！最近唔知點解，唔記得邊度見到張相，見唔到你個樣，只係見到你背脊，你知啲蝙蝠瞓嘅時候係倒轉嘅，你背脊就好似倒轉嘅蝙蝠，嘩！幾犀利呀！睇唔到你個樣，但啲人見到話係你，我話唔係呀話？真係好堅，我都要跟你學習，你搵邊個教練？」（祖兒：我邊度有呀？）
笑言驚畀發嫂鬧
祖兒：「發哥你幾時同我行山呀！我都好想同你行鳳凰山，睇日出吖，再影相，跟住再食早餐，約定你！」
發哥：「姐姐，上鳳凰山要過夜喎！（祖兒：吓？係咩？鳳凰山要過夜咩？）嗰度地方得丁屎咁大嘅屋仔喎！我哋兩條友落去，又唔夠我哋瞓喎！但如果你話，我同你上去又唔好同埋龍哥逼埋落去又逼到爆，咁又梗係唔好，鳳凰山呢，我帶你兩個去一次，六點幾上到去之後我就走先，你兩個繼續睇日出，我就唔喇，因為我怕，驚黑，所以通常唔喺啲山度過夜，留番你同龍哥去喇吓。」
祖兒得知跟發哥行山要過夜，個心當堂十五十六，又想去又驚發嫂鬧，她說：「其實我真係冇諗過鳳凰山得咁細地方同要過夜，但係如果可以同發哥過夜呢……我都驚發嫂會鬧，都係唔好喇！唔敢、唔敢、唔敢……」
廿五集盡顯急才
一連25集的《我愛發哥》終於圓滿結束，發哥見招拆招盡顯急才，fans得以了解偶像風趣真實一面，相信必定大感滿足！發哥最後搞笑跟fans說：「傾咗咁多集，我口水都乾埋，要再搵我？我未必得！等等一年半載又未定，五年十年又未定，你伸長條頸慢慢等吓等我得閒先！係咁多謝晒！拜拜！」要重溫全套《我愛發哥》？即刻Download《東網巨星》App
文：陳偉立
採：許妍詠、衞紫敏
攝：秦健輝、樊愛慈、鄭家俊
|
鍾意就快D Share啦！
|
|
|