掃呢頁CODE去手機

2015年7月31日 星期五

明星足球隊廣西衝突 黃日華:唔應該有呢種事發生! [忽然1周 - 1044] 黃日華,MW,



53歲嘅華哥,近年經歷老婆梁潔華大病,其實已經收晒火。周三,佢講番件事,仲話保證以後盡量阻止同類事情發生。

媽咪姐

明星足球隊廣西衝突 黃日華:唔應該有呢種事發生!

中港矛盾,日日都喺我哋周圍出現,真係講到悶,講到忟!點知,明星足球隊周日( 26日)上到廣西東興市踢慈善賽,都同當地足球隊爆衝突,仲有內地網民話黃日華使出「降龍十八掌」㖭!嗱,事後帶隊嘅譚校長已經解釋咗係落後嘅東興隊去到臨完場表現比較粗野,所以雙方先有碰撞。為保球員安全,佢最後決定拉隊離場。

周三( 29日)下晝,明星足球隊收拾心情復操,媽咪姐梗要跟去睇吓慰問吓被大陸網民話「出掌」嘅黃日華好大方講番件事:「球場上輸緊波,沉唔住氣好正常。球場係英雄地,雙方都有責任。佢哋稍微踢得好些少呀,我哋又沉住氣呀,應該無呢件事發生嘅!我哋事後檢討過,日後出去比賽,要同對方溝通得好啲,以和為貴!」

嗯,就咁聽都感受到華哥好明白事理,而同場嘅家英哥亦同媽咪姐嗌寃枉,仲話:「我俾人踢㗎咋!」真係陰功豬豬咯,呵番呵番,下次媽咪姐去同你打氣,加油呀!

周日,明星足球隊去廣西東興市踢慈善賽,原本氣氛融洽,黃日華仲喺中場休息時間唱歌助興。

球場爆火

點知去到比賽尾段,落後嘅東興隊愈踢愈粗野。在校長一再投訴下,仍剷傷咗明星隊一名隊員,最終引發雙方球員衝突。

68歲嘅家英哥話自己喺廣西比賽俾人推,好鬼慘!好彩佢呢日跟明星隊復操,仲行得跑得。

譚校長見慣世面,冇俾廣西衝突事件影響心情。周三落住雨踢波都狀態大勇!

呢日馬明 BB都有跟操,踢完波仲除衫檢視腹肌。嘩!

有去廣西比賽嘅張兆輝,呢日就話:「校長都澄清晒㗎啦,我哋都係踢波咋!」

譚校長話自己要講嘅都講晒,見佢全程笑容滿面,果然睇得開!

網民力撐

衝突發生後一日,校長特登喺微博 post文解釋成件事嘅因由,仲得到好多網民留言支持㖭。

鍾意就快D Share啦!