全知言
最經典童星 馮寶寶冇得輸
近期美心妹妹寫真出事，其實仲有好多童星個樣「巧打耳」討人喜歡，遠古嘅小柏林同早年嘅萬寧妹妹都係靠萌出位。講到童星，一班藝人心目中亦有唔同答案，秋生仲話有啲童星好騎呢喎！
黃秋生：馮寶寶 識做戲
因為由細睇馮寶寶啲戲，好似《小白龍》，而呢部係最出名嘅！嗰陣時童星都多，不過有啲都幾騎呢，好似阮兆輝成日做埋啲好慘嘅角色，「阿媽你又唔理我呀！」，但寶寶姐喺《小白龍》係做英雄，大家都有同感，細路仔梗係鍾意小飛俠㗎加上可愛又識做戲，唔係話第二個唔識做戲，不過做苦情戲嘅太苦情啦，唔係好鍾意！
周家怡：小柏林 夠得意
嗰時成日都睇到小柏林嘅戲，細個睇已經覺得佢好得意，好似聽聞佢𠵱家已經結咗婚，希望佢繼續都咁幸福快樂，好似細個咁有童真咁快樂！
夏尉喻 Barbie：小柏林 內外兼備
我印象最深刻嘅童星係小柏林，記得以前有個《小柏林週記》，佢會做啲好得意嘅嘢，因為以前同佢都係咁上下年紀，好想同佢做朋友，所以好留意佢嘅動向，加埋升中有啲朋友去咗佢間學校，仲做咗佢同學仔，所以我就知多咗佢嘅資料，好似為人、成績同運動方面嘅嘢，更加欣賞咁外內兼備嘅人！
麥子樂：唐寧 演得好
好記得唐寧有演過一套《白髮魔女傳》，佢係做張國榮嘅童年，因為我好鍾意張國榮，我又覺得呢個人又演得佢幾好，又幾似，原來 find out佢係個女仔，覺得幾得意。到大個咗入咗 TVB之後，同佢又拍過對手戲，感覺都幾不可思議！佢𠵱家變咗一個靚媽媽，成件事都好美好，婚姻生活又好愉快，都好祝福佢！
潘燦良：馮寶寶 夠經典
我最深刻印象嘅童星一定係馮寶寶！最記得細個都會睇好多粵語長片，好記得《夜光杯》，記得佢有分上下集，睇住呢個細路仔點樣去搵媽媽，點樣去想得到媽媽嘅愛護，所以佢畀我印象非常深刻！我覺得佢對香港人嚟講係一個經典嘅童星，代表咗好多細個嘅經歷，演出至今仍然非常記得。
牛雜妹李美琪：美心妹妹 好精靈
睇過 Celine妹妹楊鎧凝部《愛我請留言》，入面個角色好可愛好討人喜歡。因為美心廣告出名叫美心妹妹，自己覺得佢𠵱家個樣唔同咗同大個咗，但就依然有個好可愛嘅大眼仔，依然好精靈活潑！
街坊：美棋 BB好靚女
至於一班街坊要求簡單得多，個樣夠靚夠得意已經攞晒分
Vicky：最深刻印象童星係《行運一條龍》嘅美棋 BB，細細個睇已經覺得好得意；近呢兩年又見番佢，覺得佢真係好靚女，仲愈變愈靚女！
Koey：我心目中最深刻印象嘅童星係楊家盛，因為佢係我學校嘅師兄，記得佢拍過《居家兵團》，細個肥嘟嘟好可愛。
|
鍾意就快D Share啦！
|
|
|
