| 麥明詩年紀輕輕，已有一套人生致勝之道！ | next 1/1 pre |
 | |
| 成世人唔係淨係得讀書，所以麥明詩選擇拍拖去充實人生經歷。 | next 1/1 pre |
 | |
| 雖然麥明詩澄清並非年年考第一，但在大家眼中絕對是叻女一名！ | next 1/1 pre |
 | |
| 大家覺得麥明詩係「長勝將軍」，不過佢話自己都有輸過，就係喺劍橋唔可以拎First Hon畢業。 | next 1/1 pre |
 | |
| 曾經面對失戀，麥明詩將悲憤化為動力，用讀書去分散注意力。 | next 1/1 pre |
 | |
| 麥明詩樂於迎接每一個挑戰！ | next 1/1 pre |
 | |
| 麥明詩（中）在港姐比賽中，以大熱姿態擊敗勁敵龐卓欣（左）及郭嘉文摘后冠，又贏一仗！ | next 1/1 pre |
 | |
| 麥明詩在劍橋畢業百感交集，苦讀三年終於學有所成。 | next 1/1 pre |
 | |
| 劍橋每年有多個大大小小的宴會，讓一班學生哥走進大人世界，增加見識。 | next 1/1 pre |
 | |
| 在女拔讀書時，麥明詩不時開派對，與同學感情要好。 | next 1/1 pre |
 | |
| 麥明詩小時候經常黐着哥哥玩，長得像個男仔頭，但都試過搽唇膏做花女。 | next 1/1 pre |
 | |
| 小妮子初長成，悉心打扮參加宴會，學習長大。 | next 1/1 pre |
被譽為「史上最屈機港姐」的麥明詩（Louisa），掛着「十優狀元」、「劍橋學生」之名參選，以無敵姿態摘取后冠，令「宿敵」龐卓欣屈居亞軍。只有23歲的她，看似已經「由頭贏到落尾」，全因一顆好勝心！談到好勝，她聳聳肩說：「平常人眼中我可能係好勝，不過我唔係唔輸得起，我唔怕失敗，所以我先會勇敢去嘗試！」
愛贏才會拚，Louisa自認享受挑戰：「人生就係不停面對挑戰！」她的人生由不同的目標組成，每踏入一個階段就會給自己一個目標。法律系畢業的她，最叻並非背書，而是計算美滿人生方程式！
失戀化悲憤為讀書
Louisa的成功方程式，男友也是其中一個「X」值。圍繞身邊的緋聞男友非富則貴，近日曝光的正印男友林作（Joe）是牛津畢業生。她認為兩個人拍拖最重要溝通到，並不介意對方是否「有米」，還自爆：「同住屋邨嘅男仔試過，亦都試過同會考麻麻嘅男仔一齊，其實都OK㗎！感覺係最重要，而感覺嚟自溝通！」提到擇偶條件，她希望自己的Mr.Right能給她動力一起進步：「我有一份強烈嘅上進心，會為咗自己嘅夢想，有一份好大嘅動力，呢點係未必每個男仔體諒到。如果佢同我一樣有咁嘅上進心，咁我哋就可以更有默契，仲可以一齊進步！」在劍橋的日子裏，原來拍拖也可以令她成績猛進：「我覺得拍拖同埋學業係相輔相成，劍橋入面嘅男仔都好有上進心，見到佢哋咁勤力，我會諗係咪應該唔好花太多時間上網呢。就算我哋拍拖，都係約9點鐘一齊去圖書館，之後食飯，食完又返圖書館！」即使有時面對失戀，學業行先的Louisa也有調節的方法：「我失戀時可以化悲憤為動力，因為嗰段時間我要靠讀書嚟分散注意力！」
拍拖減壓搵番平衡
對於愛情，Louisa也有個時間表。完成會考後，情竇初開的她才正式拍拖！問到幾時第一次拍拖？她含蓄地笑說：「咁中六、中七時都有啲Puppy Love嘅！」能夠考得10A，全靠她夠專心準備會考：「我都幾識諗，當時會學業行先。考完會考之後，我知道我學業上有着落，咁我咪開始諗拍拖，會考好大壓力，我覺得我要搵番啲嘢平衡！同埋成世人唔可以淨係得讀書，可能拍拖都畀到另一番人生經歷我！」
「人生贏家」Louisa在愛情上一步一步來，最後令她在愛情及學業上取得雙贏。但這種「不敗之軀」不是天生的，好像就讀拔萃女書院的她自小也是成績中等，她說：「其實外界話我年年考第一係誤傳，學校入面係冇排名嘅，只係有個全體學生嘅平均分，我嘅分數只徘徊喺平均分嘅上上下下，尤其小學時成績中等，好少係最高分嗰個！」她笑言上到中學，才有更強的上進心，使成績步入佳境：「可能呢啲上進心就係外界所指嘅好勝」
唔及同學又勁又勤力
直到迎接會考挑戰，Louisa取得人生其中一個輝煌「勝利」。言談之間，她說考10A考得輕鬆，只不過是她每一科成績平均，加上有好的讀書方法和鎮定的考試表現。她笑言當初報考十科，只是因為不想考高考（A-Level）：「我冇想像過自己會拎10A，其實我目標只係想拔尖，因為我知我一定考唔到高考㗎喇！尤其我讀理科，聽講香港理科高考係全世界最難。我諗住報十科，可以多一個失手嘅Quota！」之後Louisa在學業上再下一城，入讀英國著名學府劍橋大學，也達成了她的兒時夢想。
「好勝」的她自認也有輸過，被問到輸過甚麼？她說：「Um……一定有輸過，但我驚講出嚟，外界唔覺得呢啲係輸。」追問下，她才答：「可能係大學時冇得拎First Hon（一級榮譽）畢業！」不過，她認為這次輸得心服口服：「大學入面嘅人好勁，有啲好勤力，有啲又勁又勤力！我入到去知道自己唔係呢種材料，所以就唔再將學業睇得咁重！」
受壓封后冇穿冇爛
後來，Louisa在畢業後遇到另一項新挑戰－－選港姐。入劍橋大學，要與來自世界各地的精英競爭；但選港姐，競爭對手就只有其餘11位佳麗。正當外界以為Louisa能不費吹灰之力摘后冠，原來她認為選港姐與入劍橋一樣難！她說：「我報劍橋同選港姐，都係我人生中最大壓力嘅階段。」如果將兩件事強行作出比較，她思考良久，才支吾說出：「其實……兩個都難！」她補充：「入劍橋成績好係基本，但仲會睇學生有冇一個敏捷思維。雖然我成績幾好，但我始終對我嘅思維能力冇乜信心，所以我本身都覺得9成入唔到！至於選港姐，我覺得多咗好多外來壓力，例如外界希望我嘅言行可以更有智慧，但我不嬲都唔覺自己係好有智慧嘅人。」最後，Louisa都不負眾望成為港姐冠軍，她最自豪的不是能夠成為第一名，而是可以跨過挑戰：「呢段時間面對好多流言，我最有成功感係可以順順利利度過，依家都冇穿冇爛！」
「想拍戲！任何角色都想做」
外界覺得Louisa「樣樣掂」，但她卻深明人無完美。就像中學時期，她自認只是個讀書機器，不但經常遲到，亦非老師眼中的「好學生」，就連女生最愛的扮靚也不會，她笑說：「當時我覺得，冇乜需要嘅嘢係唔會嘥時間去做，都係讀書啫！返學都係見一班女仔，就算我唔靚都冇乜所謂，所以我都懶去用洗面奶洗面，或者敷Mask保濕，返學時又披頭散髮，其實都幾不修邊幅！哈哈！」
入劍橋學埋Social
直到入讀劍橋後，她才受到當地環境及風氣影響，知道甚麼是「Presentable」，她說：「學校除咗要求我哋喺學術上有追求，仲希望我哋識得Social，所以會鼓勵我哋化淡妝，着有剪裁嘅西裝，同埋會畀機會我哋參加唔同社交場合！」
唔做女主角
千辛萬苦考入劍橋，她以課外活動來豐富校園生活，並參加話劇團。別以為樣子甜美的她定必擔當女主角，她不欲鋒芒太露，反而甘心當幕後功臣，專責度橋和寫劇本。雖然是課外活動，但她也認真對待：「我幾鍾意話劇，因為可以代入角色去反思人生！」而她也不抗拒由幕後轉戰幕前，她表示對將來心大心細，希望迎接不同挑戰：「拍戲都會係一個好嘅嘗試，任何角色都想做，希望可以透過演戲帶唔同訊息同反思畀觀眾！」
劍橋畢業興奮到喊
劍橋大學是世界頂級學府，Louisa有幸在這裏攻讀法律，實在為父母爭光！在劍橋三年，每張面孔，甚至一草一木都令Louisa記憶猶新，談到校園生活，她說：「我喺劍橋積極參與學校事務，仲參與香港及中國事務會，每年都有Dinner，我都會去。」Louisa去Ball都穿得特別性感，對此她笑說：「劍橋係老校，去Ball有傳統，我不嬲都希望做到最好，所以着到最靚，適應番個場合，不過學校一年有十幾廿個Ball，所以去唔晒！」她又表示入劍橋最興奮的時刻就是畢業：「攞畢業證書一刻，真係興奮到喊，三年好辛苦，壓力好大，因為嗰度啲人太勁。」
Louisa飛上枝頭成為冠軍港姐，但小時候卻是一個男仔頭，她說：「細個黐住哥哥，哥哥玩乜我就跟住玩，好似LEGO、機械人，大個少少就偷偷哋打遊戲機。」小時候的她未懂得貪靚，最記得是做花女，媽媽為她化妝，她笑說：「搽唇膏好唔習慣，黐立立令到我全程都擘大個口，哈哈！」
|
鍾意就快D Share啦！
|
|
|
