家計會早排推新廣告，勸人多生仔，話:「只要計劃好，想生幾個，心中有數」，拿，生兩個呢，就打孖上；生夠四個呢，可以搞大合唱；生多啲呢，仲可以組籃球隊。
港爸港媽大嗌離地，但估唔到已經做咗半個強國人嘅陳浩民，已屆45歲，一樣有心好力，同老婆蔣麗莎(Lisa)三年抱三，一仔兩女，一家五口，美滿家庭，好幸福啊!
Lisa同老公一樣，不時喺微博貼佢哋一家嘅相。今日佢就貼咗一輯成家去馬房玩嘅相喇，咦，抱住囡囡嘅Lisa，個肚好大喎……唔通又有咗？
網民即留言恭喜Lisa，仲大讚佢哋生B嘅速度好快。不過睇番Lisa上個月嘅微博，又係去馬房玩嘅相，當時Lisa嘅身型都仲好fit，冇理由漲得咁快0架？所以有可能其中一輯係舊相，但亦有可能係角度問題，又或者係食得太飽嘅……如果真係有咗的話，真係想問一句，全盛期嘅陳浩民可以造幾多個BB呢？
其實全盛時期嘅陳浩民，都成日俾人懷疑佢又做老竇。今年4月，兩人出席活動時，發現Lisa身形好似又豐滿咗喎，上年12月先至生完第三胎，唔係咁快又……佢一聽到即問太太:「係咩？你又懷孕咩？」又笑笑口話:「每次都係意外，去親旅行都係咁，總之順其自然啦。」會唔會每年「興奮」一次？佢話:「好喎，keep住佢。」嘩……咁家計會下次再拍「催生」廣告，記得搵埋陳浩民一家喇。
陳浩民生B時間表
2011年11月30日:大女雅薷(Elizabeth)出世
2013年9月23日:囝囝璟逸(Cyrus)出世
2014年12月12日:細女若嫣(Isabella)出世
2015年？月？日:細仔/女(名未知)出世(好似係)
|
鍾意就快D Share啦！
|
|
|
