盈盈抱細女出院 嘉樂：樣似媽咪
周三凌晨產下次女Kassidy的湯盈盈，昨日在老公錢嘉樂、大女凱晴、媽咪及好友梁靖琪陪同下與B女出院。有傳盈盈曾表示細女若不似她，她便發爛渣，昨日細女首度曝光，嘉樂指細女似足媽咪，兩個女一人似一個，十分公平。上圍升級不少的盈盈，表示第一胎餵人奶不成功，所以今次會坐月兩個月專心學餵奶；而她昨分享生女喜悅之餘，還跟樂樂連環咀嘴，甜蜜爆燈。
現年40歲的湯盈盈，繼兩年多前為錢嘉樂誕下大女凱晴（Alyssa）後，周三凌晨再誕下6磅15安士細女Kassidy。昨日嘉樂帶同大女到山頂嘉諾撒醫院接盈盈和Kassidy出院，嘉樂經理人向傳媒大派金莎朱古力，分享盈盈樂樂再為人父母的喜悅。
【企定任影】
■嘉樂昨日帶大女凱晴接盈盈和細女Kassidy出院，一家四口大晒溫馨。
【冧爆咀嘴】
■錢嘉樂跟湯盈盈昨在訪問後上演真人騷，甜蜜咀嘴，幸福滿瀉。
【B女曝光】
■在外婆懷中的Kassidy半夢半醒十分可愛，鼻子更似足媽咪。
【一家四口】
■嘉樂指大女似自己，細女似媽咪，一人似一個十分公平。
微博圖片
「自己冇乜地位」
昨下午3時許，化了淡妝的盈盈抱住細女與嘉樂及大女現身，雖然盈盈一身黑衣襯灰色長頸巾，但仍隱若見到上圍升級不少。日前嘉樂大爆盈盈指今胎若不似自己便會發爛渣，昨日Kassidy首度曝光，看來似足媽咪，而Kassidy瞇起眼伸脷和打呵欠，十分可愛。傳媒拍過照後，便由B女契媽梁靖琪（Toby）先抱上車休息。
之後盈盈與樂樂接受訪問，採自然分娩的盈盈指生B後第二日傷口已經埋口，並不感疼痛。問會否再追多個，盈盈笑謂：「咁快？唔諗住。」嘉樂則笑謂：「𠵱家一屋都係女，自己都冇乜地位！」可覺細女似爹哋還是媽咪？嘉樂指細女似足盈盈：「一出嚟好似外母，因為盈盈個樣好似媽咪。」盈盈指細女似家姐，並不怕肉麻說：「似爸爸我OK呀，我唔嬲錢嘉樂，我鍾意㗎嘛！」記者問她是否曾揚言細女若不似自己便發爛渣，但盈盈昨日否認說：「我冇講過喎，完全唔係。」嘉樂聞言反駁說：「你有講過，我聽咗好耐，𠵱家講到好豁達咁呀？不過，今次都係一個好結局，公平囉，一個似我，一個似佢！不過似我着數啲，因為靚囉！」
搵按摩師催生
嘉樂揚言會獎勵太太，感謝盈盈先後送了兩份大禮給他，嘉樂說：「𠵱家very good，心目中完美家庭，一路想要兩個小朋友，𠵱家做到。」說到今次生女經歷，盈盈坦言初時十分擔心：「醫生話BB個頭好大，要催生，但我想自然生，唔想開刀，所以之前嗰晚搵咗個按摩師，聽講佢催生好靈，按咗第二次之後，我諗住唔得就拆佢招牌，點知隔咗幾個鐘就搞掂！」
盈盈表示第一胎餵人奶不成功，所以今次會坐月兩個月專心學餵奶，她說：「今次好有信心，會餵半年至一年。」盈盈強調並非停工專心湊女，一切視乎工作性質決定，但畢竟兩個小朋友要花很多精神照顧，自己也想盡量抽時間陪伴女兒成長，嘉樂聞言man爆說：「搵錢嘅嘢交畀我！」說罷嘉樂親吻盈盈面頰，之後夫婦二人更索性嘴對嘴大晒溫馨。
採訪：溫敏芝
攝影：陳俊強
■Toby昨日為好友盈盈出院打點一切。
|
鍾意就快D Share啦！
|
|
|
