JC爆安志杰浪漫求婚寄居蟹藏戒
未婚佗B的「警鐘胸」Jessica C.與未婚夫安志杰昨日由馬爾代夫恩愛返港，安志杰趁今次預支蜜月之旅浪漫求婚成功，JC幸福滿溢大騷兩卡求婚鑽戒，更稱睇寄居蟹時發現戒指，驚喜萬分，兩人又4度甜蜜咀嘴，恩愛滿瀉。
愛得癡纏的安志杰（Andy）與JC早前出席活動時默認有喜，Andy更承諾兩人旅行回來會宣布好消息。日前他透過經理人宣布已在馬爾代夫向JC求婚成功，決意要將女友私有化。
懷孕五個月
昨日兩人從馬爾代夫預支完蜜月返港，穿鬆身裙的JC與Andy十指緊扣，於早上約8時半現身香港國際機場，他們的助手亦有帶同Andy的愛犬來接機。兩人甫見記者即友善揮手，JC更忍不住與愛犬錫錫，期間更一臉幸福地大晒Andy送的兩卡求婚鑽戒。問Andy求婚計劃籌備多久？他說：「個幾月。（有咗BB先求婚？）上次出活動唔講，係因為想畀驚喜JC先，希望求完婚先講出嚟。」JC搶着說：「好驚喜，係好浪漫嘅set up同晚餐，仲係慶祝拍拖一周年紀念。（BB依家幾多個月？）差唔多5個月，本身有啲緊張，但已經慢慢適應。（有冇好唔舒服？）依家OK呀。（啱啱發現有BB有咩感覺？）好驚訝，係一個大嘅驚喜，一個exciting嘅驚喜，因為係第一次懷孕，同埋被求婚，好開心，但我知道有BB後都冇畀任何壓力Andy。」問到求婚戒指有多少卡？Andy透露近2卡，JC開心說：「收到好驚喜，戒指好完美。馬爾代夫嘅沙灘有好多寄居蟹，睇睇吓突然發現有隻戒指，我開心到無法言喻。」
未知BB性別
再問是否沒有BB就不打算結婚？Andy說：「之前有同佢傾過嘅，但我嗰陣飲醉酒，佢以為我講大話。」日前有傳兩人待BB出生後，會在美國舉辦婚禮，JC坦言暫未知詳細安排：「我唔知道，因為好多嘢嚟得太快，好多嘢要計劃，但我之後會返美國待產，生完BB再一齊返香港。」Andy亦稱暫時放下工作，陪未婚妻返美國待產，直至BB出世，並稱之後會在港補辦婚禮。
提到BB性別，Andy說：「好快會知，男女都唔介意。父母知道後都好開心。（知唔知謝婷婷有祝福你哋？）冇留意，會多謝佢。」JC此時即甜笑稱Andy以前是她的男朋友，現在是她未婚夫。她表示完成手上的少許工作便暫時停工，產後亦會休息數月，但未知預產期：「今個星期會睇醫生。（想順產定開刀？）我會努力，如果應付到，會嘗試自然分娩。」二人語畢，即應記者要求4度錫錫，表現極之恩愛。
文：名人組
|
鍾意就快D Share啦！
|
|
|
