金剛呢期當黑，之前傳佢輸波爭落成球街數，最近就因為俾負皮王梁烈唯拖累，搞到新節目未出街已消。最慘係女友蕊蕊都經常性被影到夜蒲溝仔。錢又無女又無，好慘啫。你使乜同金剛擔心無女呢？一個男人，唔靚仔唔緊要，無錢都好閒，最緊要有把口。你睇金剛呢日陪朋友去圓方買嘢，見到鋪頭入面女Sales，狂吹水，並且有疑似抄牌行為。個Sales俾佢撩到開晒花咁，仲開心到有埋肢體動作。睇佢嘅笑容，就知點解金剛咁有女人緣啦。計我話，金剛如果等錢使，不如開班教溝女啦。天下間咁多宅男呀，毒Ｌ呀，等緊金剛解決需要。商機無限，分分鐘好搵過啲補習天王呀！
