掃呢頁CODE去手機

2015年11月11日 星期三

《哪一天我們會飛》黃修平點燈 少女版千嬅:希望唔好做得核突! [FACE - 442] 黃修平,楊千嬅,千嬅,MF,



23歲蘇麗珊喺理大畢業主修環保,本來畢業後跟余鳳芝一樣好迷惘,直至上年接拍《哪一天我們會飛》後便決定繼續做演員,更加初次拍戲就提名金馬獎。

爆 Like王

《哪一天我們會飛》黃修平點燈 少女版千嬅:希望唔好做得核突!

《哪一天我們會飛》一定係近期最值得注意嘅港產片之一,導演黃修平拍過超勁口碑《狂舞派》捧紅咗顏卓靈,今次除咗有楊千嬅同林海峰飾演夫妻,又有演少女版千嬅嘅蘇麗珊( Cecilia),演活咗人見人愛同時又周旋喺兩個男同學中間嘅中六女生,更已被提名金馬獎「最佳新演員」。

Cecilia喺理大讀過環境保護,貪得意兼職 model,畢業後做過環保工作,期間拍咗個相機廣告而為人熟悉,於是放棄高薪厚職簽約 Pure Model投身模特兒行業;上年得知黃修平公開招幕新演員便膽粗粗去試,結果做咗年輕版楊千嬅。以為要學做千嬅? no no no!千嬅反而要學番佢至真,咁得意?

F:《 FACE》  C:蘇麗珊

F:點解黃修平會選中你拍呢套戲?

網絡紅人司徒夾帶最近拍片留言大讚蘇麗珊,仲講笑話願意出 20萬同佢食餐飯;訪問 Cecilia當日司徒夾帶就突然嚟踩場, 2人首次碰面,究竟佢會唔會畀出呢 20萬?定要畀多 20萬呢?下載 Face Pop有得睇!

C:拍之前我都問過佢,因為我好冇信心,又唔係讀演藝出身,所以係咁煩住佢,佢就話唔好理咁多搵你唔係因為你好過人,唔係因為你啲戲好,亦唔係你靚,總之你啱個角色就係啱。後來佢至講係因為我夠自然,因為 casting嗰陣,喺間房仔試咗場戲係要掉啲紙上天空,講:「我要放一萬架紙飛機!」修平形容我好奔放喎,唔覺得造作所以揀我。其實我本身好怕醜好怕對住人,我諗係我可以無視周圍事物嘅能力卦,哈哈!

F:扮演年輕版楊千嬅有難度嗎?

Cecilia自覺外貌唔多似楊千嬅,不過同樣乜都笑一餐而且性格樂觀。

C:修平問我個樣可唔可以似佢啲?我都諗個樣點可以似佢呢?我已經冇化妝嚟喇喎!我上網搵番千嬅啲片睇,嘗試學佢嗰種自然,好真實嘅神情;但導演後來反而同我同游學修(演年輕版林海峰)講,你哋唔好去學千嬅同林海峰,你哋要做嘅係呢個角色,所以之後係佢哋睇番我哋點樣演,然後佢哋再去揣摩廿年後佢哋係點。套戲係拍咗年輕戲份先,休息咗一個月再拍佢哋嘅。同千嬅見過面但冇乜溝通,戲入面得一場會相遇,呀!我係咪劇透咗?反而宣傳時交流多啲,我完全想像唔到明星係咁 nice嘅!佢好好㗎!佢接受訪問會讚我哋做得好好,就算佢自己做其他訪問都會提我哋 3個,睇得出佢好畀機會啲新演員。

F:戲中余鳳芝嘅性格同你似唔似?

導演黃修平(左一)一向愛捧新演員,今次除蘇麗珊外,學舌鳥主腦游學修(右一)飾演年輕版林海峰,演藝畢業的吳肇軒演性格討好嘅同班同學。

C:余鳳芝係好迷惘,唔知未來想點,係冇乜夢想嘅人,灰灰哋咁同我性格好唔同,我好樂觀又鍾意笑,拍戲嗰陣導演不斷㩒低我:你太開心喇!我用咗兩個月去準備呢套戲,導演叫我每一日都諗下呢個角色,一件好細嘅事,可能只係拎起杯咖啡,鳳芝會點樣拎呢?或者做同一件事鳳芝想法同我有咩唔同呢?臨瞓前都諗下,諗諗下就入咗個角色。拍完之後同朋友出街,朋友問點解我有啲唔同咗?點解咁少嘢講嘅?係咪唔開心呀?我唔係呀我好開心呀!至發現個角色原來影響咗我,但到𠵱家應該回復番蘇麗珊卦!

F:入圍咗金馬獎「最佳新演員」有乜感受?

C:完全唔敢相信,嗰日行行下街突然收到呢個消息,好耐都消化唔到。我拍嘅時候係好冇信心㗎,身邊人都 feel到,我成日問點先可以做好啲,戰戰兢兢,導演又唔俾我哋睇 play back所以好擔心!知道(獲提名)時都未睇套戲,我唔識點形容,剩係希望唔好做得咁核突就好喇!如果攞到獎又要面對一個問題,之後條路點行呢?對我嚟講係一種壓力,可能反而唔攞好啲! touch wood touch wood,哈哈!

《哪一天我們會飛》講林海峰同楊千嬅結婚 10年,感情轉淡,千嬅方發覺年輕時放棄的另一段感情更值得回味,女觀眾入場請帶定紙巾。

蘇麗珊係 Pure model旗下模特兒, Olympus相機電視廣告應該最多人記得。

攝影:楊學

服裝: Agnes b

鞋: Lacoste

鍾意就快D Share啦!