Kelly V到落肚臍：結咗婚好似勁啲
榮升「星媽」的天后陳慧琳（Kelly）前晚於紅館開騷，換上Deep V開到落肚臍的貼身性感舞衣，扭腰又擘髀自摸「誘惑」觀眾，連表演嘉賓張家輝亦笑問：「有冇搵泥膠抆住，驚佢攝親？」採：音樂組 文：專案組
Kelly再踏紅館舞台，以超性感舞衣加自摸舞步回饋歌迷。
張家輝擔任嘉賓，現場放笑彈掀起高潮。
Kelly與大頭公仔舞蹈員「比舞」。
「肩」靚之餘，Kelly還輕晒美腿。
蝦餃仔捧着一大盒爆谷，與父親Alex往睇戲。
Kelly於個唱上多番感觸眼紅紅。
陳慧琳一連9場《陳慧琳let's celebrate！世界巡迴演唱會》前晚在紅館開鑼，相隔近8年再度開演唱會的她，魅力不減當年！她穿上紅黑閃爍貼身舞衣又唱又跳揭開序幕，連唱幾首快歌後，即唱出經典慢歌如《風花雪》及《有福氣》等，更表示除了歌唱事業，電影對她亦同樣重要，一度口震震講到想喊。
張家輝蝦碌甩嘴
出名是打底王的Kelly，在台上大解放，換上性感黑色超Deep V貼身Jump Suit，將弗爆身材表露無遺，Deep V更開到落肚臍位置，令人眼前一亮，觀眾不禁即場尖叫。於舞台Solo的Kelly雖貴為媽咪，但跳舞時出動三招「誘惑」觀眾——趷籮、扭腰、擘髀自摸做到足，之後與多位舞蹈員起舞，又笑笑口問觀眾：「好唔好睇？我仲得唔得呀？呢Part都排得辛苦！」擔任音樂總監的雷頌德亦忍不住大讚勁，Kelly則搞笑地說：「結咗婚好似勁啲（指體力）。」
與Kelly分屬同門的張家輝擔任表演嘉賓上台，Kelly識做地大讚他的新片《陀地驅魔人》票房收得，家輝聞言即「取笑」Kelly太性感：「唔夠你演唱會勁，你個Deep V開到落肚臍！有冇搵泥膠抆住？驚佢（肚臍）攝親！」Kelly爆笑回應：「下面搽白花油驅風。」二人的對話引來連場笑聲，家輝又自爆多年前曾考無綫舞蹈員訓練班，Kelly即問：「咁點解過咗亞視？」令家輝當場語塞。最後Kelly將舞台交給家輝，家輝搞笑Hard Sell《陀》片，隨即唱出主題曲，但卻蝦碌突然忘記歌詞甩嘴，他尷尬地說：「再嚟過，唔好意思，我好完美主義！」再度獻唱時，博得現場觀眾歡呼加油！
老公湊仔食爆谷
Kelly忙開騷，老公劉建浩（Alex）則負責照顧兒子，昨日Alex帶同大仔劉昇（蝦餃仔）現身尖沙咀一間戲院睇戲，雖然原先不欲拍照，但Alex後來亦大方應要求與蝦餃仔合照，問到蝦餃仔有否看媽媽的演出？可愛的他捧着爆谷說：「有睇。好好食。」盡顯童真。
Kelly再踏紅館舞台，以超性感舞衣加自摸舞步回饋歌迷。
張家輝擔任嘉賓，現場放笑彈掀起高潮。
Kelly與大頭公仔舞蹈員「比舞」。
「肩」靚之餘，Kelly還輕晒美腿。
蝦餃仔捧着一大盒爆谷，與父親Alex往睇戲。
Kelly於個唱上多番感觸眼紅紅。
|
鍾意就快D Share啦！
|
|
|
