2016年2月11日 星期四

牛津大胸夜蒲女 有愛心 [壹週刊 - 1353] __,M1,

爆壹爆牛津大胸夜蒲女 有愛心早排佐敦一間夜場,搞咗個乜嘢事業線比賽,即係一班女仔鬥低胸、鬥晒事業線囉。唔好以為參加嘅女仔,都係胸大又冇腦嘅MK妹想出位。爆哥就識咗當晚得到亞軍嘅Sammie,傾落先知,咦,呢條女唔講得笑。有幾猛料?講出來嚇屎你,原來大胸Sammie係人生勝利組,自稱係英國華威大學法律碩士,再喺牛津大學讀哲學同宗教,即係十優港姐麥明詩男友林作個校友。而Sammie畢業後返咗香港工作, ...


爆壹爆

牛津大胸夜蒲女 有愛心

早排佐敦一間夜場,搞咗個乜嘢事業線比賽,即係一班女仔鬥低胸、鬥晒事業線囉。唔好以為參加嘅女仔,都係胸大又冇腦嘅 MK妹想出位。爆哥就識咗當晚得到亞軍嘅 Sammie,傾落先知,咦,呢條女唔講得笑。

有幾猛料?講出來嚇屎你,原來大胸 Sammie係人生勝利組,自稱係英國華威大學法律碩士,再喺牛津大學讀哲學同宗教,即係十優港姐麥明詩男友林作個校友。而 Sammie畢業後返咗香港工作,依家已經係一間投資公司嘅 CEO,真係巴屎閉。爆哥當晚見佢著到鬼咁低胸,加上佢身材好勁,一副戰鬥格咁款,仲以為佢係等仔溝嘅 MK妹添。 Sammie同爆哥講,平時星期一至五,佢都會好專心返工,好少出去玩。但到週末,就喜歡約埋朋友出去老蘭夜蒲輕鬆吓。

除咗夜蒲, Sammie原來好有愛心,年幾前同一班朋友組成一支義工隊,定期去油麻地探訪露宿者和獨居老人。聽 Sammie講,義工隊成員會收集身邊朋友捐出嘅物資,好似衣服、日用品同食物,再轉送俾露宿者同三個尼泊爾難民家庭,「小朋友點可以瞓街㗎?尤其是呢排天氣咁凍,希望政府可以盡快幫到佢哋。」哇,有愛心到呢,爆哥都想去露宿半晚等姐姐錫。

新年前夕, Sammie(中)又同義工隊走去油麻地探望露宿者。

Sammie的 Fb貼文,經常提及探完露宿者的感受。

Sammie出席牛津校友的聚會。

勝和超級叔父「國龍」仙遊

上星期有一晚凌晨,爆哥又收到江湖朋友電話。呢個時間打嚟,多數唔會係好事,今次都唔例外。朋友話,和勝和超級元老國龍,喺仁安醫院病逝,終年九十歲。國龍係勝和嘅精神領袖,所以當晚好多勝和猛人,都即刻趕去醫院,見國龍最後一面。

聽朋友講,國龍雖然已經一把年紀,但喺社團入面,仍然係最有地位一個。因為國龍係香港打完仗光復後,和勝和第一任坐館,依家勝和成個社團,起碼有八成人都係國龍嘅徒孫,幾猛幾寸嘅大哥見到佢都要低聲下氣。由於佢咁有江湖地位,所以每次佢開聲話邊個做坐館,都唔會有人夠膽反對。而呢排江湖上已經吹晒風,話勝和會幫國龍大搞喪禮,已經定咗今個月二十九號,喺世界殯儀館設靈舉行幫祭,三月一號出殯。而八人扶靈名單中,除咗現任四個辦事人之外,其餘四個會係社團有分量嘅元老,包括國華、三萬同埋英偉等人,但就冇呢期避走嘅上海仔份。

國龍(中)已騎鶴西去,勝和第一任坐館故事仍留下來。

大批門生曾趕去醫院見

國龍最後一面。

酒樓部長喪插反魚翅黨

爆哥好多撈家老友鍾意魚翅撈飯,梳翅幼啲都睇唔上眼,特別係尖咀鹿鳴春嘅雞煲翅,就堅好味,真係食到個嘴流晒口水。

不過凡事有兩面,而家講求保護生態,愈嚟愈多人提倡唔好食魚翅,好似上星期五爆哥去北角某間酒樓食 lunch,食食吓有嘢睇,見到一群著住鯊魚 look嘅人走上酒樓,仲扮到雙鰭被割斷血淋淋咁樣,令人即刻反晒胃。最激係佢哋剷上酒樓,呼籲食客唔好食魚翅,部長即刻嬲爆爆衝出嚟,喪鬧佢哋依家經濟咁差仲出嚟搞搞震阻住做生意,成間酒樓花生友即刻攞部手機影低兼高呼:「擺你上網啦,咩呀,咩呀,睇吓邊個 hitrate高。」被人插,快閃黨「香港護鯊會」成員 Joan都好無奈,佢同爆哥講,佢哋無非都係想喚醒大家愛護鯊魚,呢個係世界潮流,佢哋一旦被割去雙鰭,根本冇可能生存到。都明嘅,要食少啲啦各位。新年快樂呀!

爆哥乜料

金融界撈家,穿梭黑白政商界,朋友遍布旺角至中環,每星期都八到

唔同料,同《壹》仔讀者過吓癮!


鍾意就快D Share啦!