人生如戲！用嚟形容今年24歲嘅盛女Whitney最啱不過，話說佢本來只係一個生於香港、住喺九龍區某一個角落嘅姑娘，直至佢早年參加咗大台搞嘅真人騷《求愛大作戰》，成個人生就改變咗咁，多人認識咗!Whitney參加完大作戰之後，2013年閃嫁咗「媽模」陳靜儀（Mia）前夫莊家傑，當時因為Mia用「姣婆遇着脂粉客」嚟形容佢哋，當時兩公婆仲一條心，唱雙黃反擊佢哋，以為佢哋打風都打唔甩，Whitney自前年同莊家傑生咗大仔Chalmers後，上年仲宣佈再度有喜陀B女，兩年抱兩，不知幾幸福，點知Whitney大住個肚，上年5月忽然用黑底白字喺網上宣佈要離婚，原因係發現夫妻性格不合，離婚係最好嘅決定……之但係兩公婆曾搵婚姻輔導幫手，一度破鏡重圓，兩公婆喺囡囡出生前，仲帶埋囝囝一齊去影美孕照，囡囡出生後，亦經常貼一家四口嘅温馨合照，以為一切雨過天晴，但原來Whitney同莊家傑已經簽紙離婚。據知Whitney同莊家傑上月已經簽紙離婚，有傳Whitney對莊家傑心死，係因為去年交托做地產經紀嘅莊家傑買樓，點知搞到買樓唔成，要撻定蝕咗幾十萬，現時Whitney身邊亦有追求者，但Whitney日前接受《蘋果》訪問，就強調二人離婚唔涉及第三者。臉帶憔悴嘅Whitney同《蘋果》講：「其實一段情侶由拍拖到結婚、離婚都有一段故事，唔想一一去講，但今次係經過深思熟慮，大家再見都係朋友，小朋友跟我，但佢都會安排時間見小朋友。」問佢離婚原因係咪同上年買唔到樓有關，定係因為有追求者？Whitney逐一解釋：「分開因為大家思想同目標好唔同，係性格不合，覺得咁樣決定最好，係好和平嘅氣氛下決定。」Whitney又話：「我哋都聽到一啲唔好嘅傳言，話離婚同第三者有關，呢個一定唔係，我哋雙方都冇，有朋友關心我，即刻介紹男仔畀我，但現階段唔會接受，只會將心思放喺仔女身上，唔想有人借機會製造假消息。」上年Whitney曾開心稱自己榮升做業主，佢承認最終買唔成：「間樓係撻咗訂，咩原因唔想詳細講，只可以話係計錯數，因為我係自僱人士，按揭嗰部份出咗啲問題，惟有撻訂，都損失咗幾十萬，再努力過，一定唔開心，但為咗仔女要堅強。」Whitney承認一直有經理人公司欲找她合作，佢話：「我從來冇發明星夢，如果有，我一早入咗行，以前有人叫我入行試下做乜做乜唔會諗，但o依家為咗一對仔女，都會試下唔同嘅發展，都想俾到年青人正能量，唔好灰心，單親家庭都可以俾到仔女幸福。」
| 採訪、攝影：小米 |  |  盛女Whitney於2013年閃嫁Mia前夫。資料圖片 |
 Whitney同莊家傑離婚收場。資料圖片 |  媽模陳靜儀（Mia）曾同前夫莊家傑互數對方。資料圖片 |
|
鍾意就快D Share啦！
|
|
|
