娛頭
大肚 5個月 香香做伴娘亞男做姊妹 老公大十年 鍾嘉欣趕嫁脊醫 Jeremy
鍾嘉欣 14年結束跟伍允龍的八年情後，一度與舊拍檔陳展鵬再傳緋聞，但原來一向鍾意將感情事收埋的鍾嘉欣，去年在胞姐撮合下，跟前無綫主席梁乃鵬姪兒 Jeremy Leung拍拖，發展接近一年，至數月前發現有餡，大住肚的鍾嘉欣情人節在拉斯維加斯唱完騷後，已戴上婚戒的她立即飛返溫哥華，着手籌備月底舉行的婚禮，伴娘岑麗香亦早已飛往加拿大幫手，而人妻李亞男屆時亦會飛到當地，出席婚禮做姊妹。
年薪百萬加幣
今年四月便三十二歲的鍾嘉欣，一四年十一月跟伍允龍分手後，一直未有確認新戀情。以為她已收拾心情，集中火力重拾一姐地位，但事業原來已不重要，因為她已經極速搵到另一半。
據了解，去年返溫哥華探屋企人的鍾嘉欣，在家姐 Annie安排下，跟早已認識的前無綫集團主席梁乃鵬姪仔 Jeremy約會，男方在溫哥華本那比區（ Burnay）開設脊醫診所，每年收入達百萬加幣（港幣約五百七十萬），是鑽石王老五。
「 Annie（鍾嘉欣胞姊）覺得 Jeremy性格好，做脊醫又係老闆，所以特登安排佢哋再見面，兩個人見番無幾耐就拍拖， Jeremy四十幾歲，大過嘉欣十幾年，所以好識遷就佢，加上有家底，嘉欣屋企人對佢印象好好，覺得個女今次揀啱人。」知情者說。
去年尾發現有餡
入行十二年，鍾嘉欣不單在香港將軍澳新都城買了兩個單位，數年前更在溫哥華買了大屋給屋企人；眼見自己年紀有番咁上下，對於發展新戀，更加投入。據了解，除了缺陣孭正新劇《警犬巴打》宣傳外，去年底發現有餡的她已向無綫請假三個月，兩年冇出過碟的她更要求將本來四月出唱片的日子向後延。
「嘉欣發現自己有咗之後，都冇通知公司，只係將出唱片嘅時間不斷延後，由今年四月改去十一月，跟住又話十一月都唔出住，搞到公司好㷫，之後更加發展到唔可以成日搵到佢。不過之前接落嘅 job就冇得唔做，好似佢同煎 Pang（陳展鵬）去三藩巿同拉斯維加斯做騷，大住肚都要唱，雖然著鬆身裙遮肚，但喺台上行得好慢，仲要水桶腰成個腫晒。
「做騷嗰晚，嘉欣唱《明天我要嫁給你》時特別有 feel，話做呢行要秘密嫁，就算嫁咗都唔可以俾人知；又話做人唔好咁多 planning……全晚不停同現場觀眾交流愛情心得，乜嘢愛情唔代表數字，唔在乎歲數……好似講緊自己同 Jeremy嘅關係咁。」知情者說。
收埋男友一星期
過去大半年，跟 Jemery打得火熱的鍾嘉欣經常請假返加拿大，今年初回港時，她忍唔住露口風，聲稱在加拿大開始學煮嘢食，同時又留定後路，說就算有拖拍都不會公開，將戀情冚實。
「過去嗰半年佢 keep住香港同加拿大兩邊飛，舊年十月放咗一個半月假，十一月初返香港開工， Jeremy都飛咗嚟香港陪佢，喺嘉欣屋企住咗成個星期，十二月嘉欣又特登飛返加拿大，同男友度過拍拖後第一個聖誕，但只係留咗幾日，又要撲返香港做倒數騷。到一月中，嘉欣又突然飛返加拿大，之後就冇返過香港。
「雖然有咗餡，但嘉欣冇特登收埋自己，因為佢住嗰區好多華人，大家都見到佢肚凸凸，仲要戴咗隻好大粒嘅鑽石戒指；即將做媽咪，嘉欣心情都好好，見到人都係笑容滿面。」知情者說。
搵定大肚婚紗
見肚冇得等！計劃月底舉行婚禮的鍾嘉欣，預先在「大佬」胡杏兒開的婚紗店問價「大肚婚紗」外，亦會上網睇婚紗晚裝，為婚禮做準備。
「嘉欣圈中朋友唔多，佢淨係搵咗香香同亞男兩個好姊妹出席婚禮。香香十六號已經飛咗過去，佢男友喺嗰邊，可以順便探埋男友，至於亞男就啱啱喺澳洲旅行返香港，佢同老公慶祝完情人節，先飛溫哥華幫手搞婚禮。」知情者說。
蒸餾水
出道 12年，鍾嘉欣一直保住純過蒸餾水形象，加上有要求，唔會亂搞男女關係，唯一正式承認的只得前度伍允龍，至於曾對她有 feel林峯，亦因形象花心冇行。
匿埋生
香港地方細，做乜都好易俾人知！藝人鍾意收收埋埋，所以亦傾向出國安胎生 B，貪外地醫療設備好可以放心，私隱度高方便封鎖消息， BB亦可成為當地公民，一舉幾得。
撰文、攝影、攝錄：娛樂組
|
鍾意就快D Share啦！
|
|
|
