蔡國威欠薪日使50蚊張家瑩靠老竇接濟
亞視今日正式停播，各藝人能否追回欠薪成疑，其中蔡國威生活就已經水浸眼眉，直指自己每日限使50蚊，猶如拎綜援！但同樣被亞視拖糧的筱靖和張家瑩卻不憂柴米，其中做生意百足咁多爪的筱靖更搞派米做慈善，名副其實「有米」之人！
亞視臨時清盤人昨晚決定遣散所有亞視員工，今日正式停播。各亞視員工頓時前途未明，即使有人一早及時「跳船」，但他們能否向亞視追回欠薪亦是未知之數。啟動僱員條例「10A」自動遣散接近1個月的蔡國威，經濟情況已捉襟見肘，連飲食都要逐蚊計：「盡量都自己煮，每日都限住使50蚊！」相當於綜援家庭每日開支。自言朝早食烚蛋、麥皮的蔡國威表示會拖到下午茶時段先食午餐：「夜晚就搵人請，尋晚就林建明負責，今晚就圈外朋友請。」打算賣車開源節流的他亦指座駕仍未售出，只好停止揸車來慳油錢。
蔡國威昨晚接受電話訪問直言，亞視宣布解散員工是意料中事：「一間咁專業嘅公司，如果唔係有真憑實據知道呢間冇錢，係唔會做出咁嘅決定。」在亞視工作多年的他直言亞視落得如此下場實在不捨，但認為這個決定是好事，好讓員工清醒過來。至於會否回亞視見證結束的一刻？他說：「我唔會返去，亦唔會MON住個電視睇住佢熄機，真係好唔捨得，望住佢熄機嗰一刻會好痛！」
劉家蔥食「老婆」本
而幫亞視拍兒童節目《我們這一家》的劉家蔥就被亞視拖足4個月糧，合共總計約17萬，惟有靠外出登台、主持工作來應付生活開支，他說：「依家都動用緊積蓄，好彩老婆都有收入。」他又指8歲的囡囡十分生性，都知亞視冇出糧：「之前每年都去兩三次旅行，但佢依家都冇開聲問我。」
雖然有人水浸眼眉，但亦有人唔憂柴唔憂米，生意仲愈做愈大。亞姐出身的筱靖表示即使亞視欠她1個月人工，經濟亦不成問題，更請得起經理人幫手接騷接Job。除搞咖啡全國代理外，筱靖更有份開德國餐廳：「嚟緊都會做埋德國啤酒代理，賺錢就呢啲。今年項目比較多，日日都忙到暈。」她更指自己與幾位新城DJ搞慈善機構，既探訪又派米，實屬「有米」之人。
而同為亞姐出身的張家瑩就表示，雖然亞視仍欠他1個月薪金，但她有個富貴爸爸為自己開水喉，更謂：「以前喺亞視做時，Daddy都會畀錢我，更何況依家？」又謂現在跟爸爸食飯，對方不但會爭埋單，更會塞過萬蚊零用錢給她：「以前都會拎亞視份糧去頂車位嘅錢，每個月都要4,900蚊。」現在她就打算用登台工作的酬金補貼車位租金。有經營日本、泰國餐廳的張家瑩又表示正有娛樂公司找她簽約，事成後希望能令事業再上軌道。
文：影視組
|
鍾意就快D Share啦！
|
|
|
