楊怡開天價續約辣㷫無綫
日前於英國與羅仲謙秘密結婚的楊怡，愛情得意但事業前程仍未明朗，據知3日後約滿的她與無綫洽談合約陷入膠着，最大分歧是原來楊怡睇準無綫現時缺乏花旦，「獅子開大口」開出天價續約條件，令無綫要重新評估其價值。
將於3日後約滿無綫的楊怡，經大半年多番洽談後雙方仍未能達成共識，據知因她睇準無綫花旦買少見少，如陳法拉與胡杏兒先後離巢，故乘機「獅子開大口」要求以現時兩倍酬勞續約，叫價之高嚇窒無綫，需要重新評估她對公司的價值！現時楊怡與無綫所簽的是包薪經理人合約，但其演出率仍未到達要求，加上她近日在英國秘婚卻未有知會公司，令無綫感到不滿，雙方傾續約陷入膠着局面。
助打入內地作籌碼
雖然楊怡與無綫陷於討價還價階段，但無綫為表誠意挽留而開出其他條件，希望縮窄雙方分歧！如無綫知道楊怡希望打開內地市場，故以與下月回巢的金牌監製梅小青合作拍劇為籌碼，讓她能參演中港合拍劇一圓心願，好讓楊怡心動續約。無綫助理總經理杜之克昨日接受電話訪問時被問到楊怡是否開出天價的續約要求？他只說：「同楊怡傾約傾得好愉快，佢要求嘅條件亦唔過分、好講道理。」
雖然「死線」逼近，但楊怡昨日仍為主演劇集《末代御醫》首度宣傳，席上講到角色最後私奔，遭羅蘭開玩笑：「有人私奔去咗英國！」身為「御醫」的郭晉安亦玩埋一份，為楊怡把脈笑說：「係喜脈，意思係收視會起。」羅蘭隨即送上BB公仔給楊怡並說：「羅伏苓（楊怡角色名伏苓），祝你連生貴子。」事後，慘遭玩謝的楊怡被傳媒恭喜做「羅太」時笑說：「多謝！我唔識應，未慣。（羅楊怡呢？）你的姓氏，我的名字。年底會補擺酒，唔想草草了事，會搵圈中人做姊妹但細節未定。（網友話唔見你戴婚戒？）謙仔覺個女仔應該戴粒大鑽石，等個注意力喺女仔度！我哋有結婚戒指嘅，但平時未必會戴驚唔見。（媽咪點評價女婿？） OK，佢好放心！（催你哋生BB？）冇！順其自然小朋友係天賜唔會心急。（減少工作？）會繼續做嘢，但係都希望舒服啲，之後會同媽咪三個人一齊住，做人老婆希望跟媽咪學吓煮餸。（羅仲謙同媽咪相處點？）冇問題！佢都好孝順。」
安仔分享生仔秘技
至於講到與無綫的續約問題，楊怡依然只表示「傾緊」：「如果續約都希望舒服啲，同公司嘅關係都好似情侶咁，希望搵到共識。（續約機會大唔大？ ）OK嘅。」她透露下月5日將出席另一次劇集宣傳，但若然未能傾掂續約，她能否出席仍屬未知之數！其後，楊怡接受內地傳媒訪問亦有講到續約，但有所暗示：「還在洽談中，我覺得去內地發展是好事，可以打開內地市場，但無論如何TVB在我心中的地位不會變，總有一天會有合作機會。」
同場的郭晉安取笑剛成為人妻的楊怡幸福滿瀉，又向對方分享生仔心得：「自己生女嗰陣時就食咗好多肉，生仔就食咗好多菜，我唔知得唔得(口架)！我就得！」至於朱晨麗曾於處女劇集《名門望族》與楊怡合作，對昔日拍檔出嫁感到很開心，希望她三年抱兩。文：影視組
|
鍾意就快D Share啦！
|
|
|
