小齊險失成副身家 報警緝騙徒
任賢齊早前被不法之徒入侵其夫妻共用的私人電腦，並盜用其電郵去信銀行，要求匯走一筆巨款，幸而銀行感到可疑，遂致電小齊太太求證，最終揭發事件！小齊有感事態嚴重立即報警，昨晨更透過律師樓向他持有戶口的銀行發信，要求加強戶口保安，若再有可疑匯款一律拒絕！問到騙徒要求之匯款涉及的金額，小齊大呻：「差唔多成副身家！」文：影視組
黑客入侵小齊和太太共用的私人電腦，還用電郵去信銀行要求匯走巨款，成副身家差啲冇晒！
任賢齊去年曾成為不法之徒的目標，騙徒致電其父訛稱小齊被綁架，向任爸爸勒索金錢，幸最終任媽媽智破騙案，才令任爸爸免招損失。
要求加強戶口保安
怎料，最近小齊再次成為不法之徒的目標，被黑客入侵其夫婦共用的私人電腦，並盜用小齊太太Tina的電郵向銀行要求匯走一筆巨款，小齊說：「佢哋用Tina嘅電郵發信畀銀行，話我哋兩公婆好忙，但又急需動用一筆錢，要求銀行盡快匯錢去一個戶口，銀行覺得可疑，就打畀Tina。Tina即刻搵我，知道冇啲咁嘅事，就即刻叫銀行唔好匯錢，因為我同太太電腦都唔叻，所以初初都唔知發生乜嘢事，而當時我又喺內地拍緊嘢，只能遙距去處理件事。當我返嚟香港之後，即刻去搵經理人公司嘅同事求助，最後發現原來有黑客入侵咗我哋部電腦，仲改動埋我哋啲密碼，發現之後，我哋即刻去報警！」
由於事態極之嚴重，小齊昨晨更親自到律師樓，詳述事件始末，然後透過律師樓向他持有戶口之銀行發信，要求銀行高度關注其戶口，如發現任何不是他本人要求的匯款，都要一一拒絕！問到不法之徒要求匯多少錢？小齊說：「差唔多成副身家！講多你哋又唔信，講少又肉酸，唔想講實際數目。（知唔知有冇其他損失？）因為電腦有好多嘢，仲有一啲網上購物嘅戶口，所以暫時唔知仲有冇其他損失。」
擔心子女資料外洩
小齊坦言電腦內還有他們夫婦的身份證副本，小朋友的個人資料，不知道不法之徒有否盜用，令他們兩公婆擔心不已。而小齊亦聽取律師的意見，主動公開事件，因為想公眾提高警覺，避免類似事件再次發生。
黑客入侵小齊和太太共用的私人電腦，還用電郵去信銀行要求匯走巨款，成副身家差啲冇晒！
|
鍾意就快D Share啦！
|
|
|
