2012年因為拍《On Call 36小時II》撻着姊弟戀，楊怡同羅仲謙呢pair，由地下情慢慢走上地面，去年12月，兩口子更十指緊扣出席胡杏兒婚宴，大方回應周刊報道指兩人今年三月結婚傳聞，謙謙大玩神秘謂:「要發生就自然就會發生，不過總之如果結婚，唔會好似雜誌所講咁神秘，會通知大家。」而楊怡就暗示唔會搶花球:「對鞋太高，搶唔到，可能派佢去搶，又可能有好多姊妹都需要。」準新娘心意已定喇。其實之前每次講到婚事，楊怡同謙謙都係笑笑口耍太極，都係嗰句:「適當時會講」，不過謙謙亦講過話係計劃中，依家積極工作，賺錢買樓。今年一月，謙謙於訪問中說:「老實講，今年8月我32歲，話細唔細，再加上我喺圍村大，所以由細到大家庭觀念都好重，好細個就知道人生嘅方向大概係點，搵份穩定嘅工，儲積蓄，結婚，生兒育女，跟住退休。」至於婚禮形式，謙謙就謂：「藝人結婚唔係私人party，係大眾party，我亦會公開講，因為我想得到傳媒祝福，真係到嗰日，我會邀請你哋嚟，你敬我一尺，我敬你一丈。」呢一日即係幾時呢？「真正時間表，其實全部都已經喺我個腦度，好似砌圖咁拼湊緊。」
來源 source: http://hk.apple.nextmedia.com
|
鍾意就快D Share啦！
|
|
|