探熱針
由朝做到晚 正職室內設計 醉駕 DaDa擺夜檔
盧頌之（ DaDa）上年 7月因涉嫌醉駕被捕，知錯的她最後被判 120小時社會服務令、罰款 3,000元及停牌 1年。形象受損，幕前工作被暫停， DaDa為兩餐，日間做室內設計，夜晚又在青衣夜市擺檔賣豬肉丸。踩到盡，只因要養家。
純利五千元
日前一年一度的青衣戲棚夜市，吸引好多想創業，資本少的人去擺小食檔， DaDa是其中一個，去年試過賣冰菠蘿，今年轉賣豬肉丸。「我肥到似粒豬肉丸嘛！試吓當玩囉，呢啲又唔使好大投資，上年賣過菠蘿，今年喺澳門引入彈牙豬肉丸，同幾個朋友一齊做。」 DaDa說。
據知， DaDa的檔位，日賣四百幾碗豬肉丸，以每碗廿元來計，每日平均有九千元收入，一連五日真君誕的生意額高達四至五萬元，扣除租檔位的二萬元及入貨錢，每人純利有五千元左右，成績算不錯。
男友探班
雖然真君誕已完，但五月七日至十一是天后誕， DaDa會繼續擺檔賺外快幫補。由藝人變小販，過到自己心理關口，不怕別人的眼光。「可以做到嘅，冇問題呀，開心咪得囉！天后誕都會繼續擺檔，不過唔只賣豬肉丸，可能會加其他嘢食一齊賣。」 DaDa說。
DaDa擺檔，除了男友 King來探班，與她同是八模之一的 A Lin，雖然已轉往內地發展，但都專程回港撐老友。
自我增值
據知， DaDa出事後冇工開，連基本生活都有問題，幸身邊有男友 King及圈外好朋友鼓勵，她重過新生活，日打兩份工。
「 DaDa見咁多人錫自己，冇可能放棄，所以一邊做健身等考教練牌，一邊增值自己，佢一向對室內設計有興趣，仲邊做邊學，仲搵到份有關工作為正職，可以照顧到自己及家人。」有知情者說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
