落超大雨呀，但粉絲繼續排隊！
天王黎明 （Leon）今晚繼續如常開騷，而比開騷有更多阻滯嘅摩天輪抽獎活動，拖咗五日亦終於可以舉行。
之前講咗話演唱會有一Part，係會喺排隊入場嘅頭100名粉絲中，抽出幸運粉絲同Leon一齊坐摩天輪，但之前因為開唔成騷，以及同埋前幾日摩天輪位置有活動、人流太多，大會為大眾安全着想一再取消相關環節，結果連日來都要取消摩天輪環節。
直至今午約兩點鐘，Leon喺Facebook宣布：「專心工作！今天一切如常，也會有摩天輪抽奬！到時見！注意安全。」同時又溫馨提示今日會有持續四個鐘嘅雷雨，認真細心！而AMusic則表示，摩天輪環節會於今晚六時四十五分進行。
一點鐘抵達霸頭位
《東網》記者今午走訪現場，於下午五點鐘左右已見有過百人排隊，排頭位嘅女粉絲為咗爭取同Leon一齊坐摩天輪嘅機會，一點鐘已經喺現場霸位排隊。大會表示係粉絲入場嘅時候，會順序派出一百張「抽獎卡」，而喺呢一百張卡入面，其中有四張印有「恭喜你，你可以乘搭摩天輪」，亦即係話，依四個個幸運兒可以同黎明一齊坐同一卡摩天輪！嘩！由自己親自「揭」曉係咪中獎，真係好緊張刺激呀！
排隊粉絲勁狼狽
不過因為中環依家已經開始落緊雨，現場嘅人都顯得有啲狼狽，又着雨褸又擔遮咁，而大會亦有細心為歌迷派發雨褸。到底喺咁大雨嘅情況下，摩天輪環節係咪真係可以如時同如常舉行？大家如果真係想知嘅話，可以黐實《東網》即時新聞留意最update消息。
來源 source: http://hk.on.cc
|
鍾意就快D Share啦！
|
|
|
