岑潔儀出書捍衞餵母乳
香港政府鼓勵母乳餵哺，但是不少公共場所、商場未能提供足夠哺乳室，更可笑是不少「親餵媽媽」餵哺初生嬰孩時，慘被歧視和辱罵。岑潔儀（Zoey）自兒子Damian出世開始餵哺母乳，15個月的餵哺生涯，亦曾遭遇不少慘痛經歷，Zoey身體力行出書為哺乳媽媽發聲，向歧視的人說：「上天賜予女性嘅胸脯就係餵哺母乳！」
岑潔儀去年1月誕下兒子Damian之後，選擇做一個全職的母乳餵哺媽媽，Damian轉眼間已經15個月大，現在仍然進食母乳，Zoey說：「開始食飯之後，其實都飲少咗人奶，一日飲三餐奶，𠵱家係輕鬆好多，頭一個月好辛苦，到𠵱家我都係親餵。」今年暑假Zoey推出親子書《我的小老闆》，前日Zoey帶着囝囝Damian到觀塘為新書影封面相，提到官恩娜餵哺母乳時被歧視的慘痛經歷，她激動地說：「當日見到官恩娜受辱嘅事，我都有WhatsApp佢，我知佢係餵母乳嘅，有時都會有啲小分享畀佢，所以我係好支持佢，我見佢發生呢件事，我都覺得有冇搞錯。」
■身為「親餵媽媽」的岑潔儀，近日出書為餵哺母乳媽媽發聲。攝影：陳慧安
■Zoey指餵哺母乳是一件世上最美麗的事，難以相信有人用核突來形容。互聯網圖片
■岑潔儀透露曾在酒樓餵哺母乳時，被一對夫婦辱罵她核突。
■岑潔儀12年嫁給大馬富商Dixon，生了一個得意B仔Damian。互聯網圖片
■Zoey帶15個月大囝囝Damian，母子檔影相作新書封面。
為哺乳媽媽發聲
Zoey表示有不少「親餵媽媽」慘被歧視，香港政府提倡餵哺母乳，哺乳媽媽卻被忽視和謾罵，她希望以藝人身份出來為一班哺乳媽媽發聲，引起更多人關注和體諒。
在Zoey的15個月餵哺過程，她亦曾經有過很多不愉快的經歷，她訴說其中一次難忘的往事：「我係『全埋身』，所以係隨時隨地都要餵奶，肚餓就要餵，試過搭港鐵餵，搭巴士餵，基本上所有地方都有餵過，我試過一次好深刻就係飲緊茶，因為啲枱好近，我喺兩夫妻枱隔籬餵緊奶，佢哋見到我餵緊奶已經覺得好奇怪，feel到佢唔妥，我都冇理，臨走喺我身邊行過：『咁核突㗎！好心你入廁所』咁就走咗喇！當下我想反擊，但係佢已經走咗。我都反擊唔嚟，我係好嬲好嬲，點解你喺度飲茶，我個仔唔可以喺度飲奶呀？同埋我係圍住啲巾，根本你乜嘢都睇唔到，係咁望住我，你可以選擇唔望，點解你望住我話我核突？話BB飲奶係核突嘅嘢？呢件係一件好美麗嘅事，點解講到咁污糟呢？」
「好需要支持」
自從那一次，Zoey便積極上網支持母乳媽媽：「我見到有啲母乳媽媽留post，因為我感同身受，所以我會即刻留言支持，餵哺母乳係好需要支持，係好辛苦、好大壓力，你擔心好多嘢，仲要理人點樣睇你，理人哋接唔接受，我覺得係錯咗囉！因為上天賜予女性嘅胸脯就係餵哺母乳，唔係俾人睇，係為咗自己小朋友，我係為咗上天畀我嘅嘢。」
採訪：楊潔雯
■官恩娜曾在網上呻餵奶被歧視，引起外界關注母乳餵哺。資料圖片
|
鍾意就快D Share啦！
|
|
|
