近日孭住兩劇的泰臣,日前一放工,便陪女友去九龍城食飯鬆一鬆。泰臣女友短髮爽朗,膚色黝黑甚有泰妹 feel。
娛樂偵訊
女友現真身 泰臣當街呵攬「泰妹」女友
由舞台跳入大台,擅長搞笑角色的「泰臣」翟凱泰,雖然跟最近又再拍住合作主持節目《我愛香港》的蝦頭楊詩敏不停傳緋聞,但男方一直堅稱自己有個拍拖八年的 OL女友。唔係講笑,日前正印終於現真身!二人拍拖到九龍城隊啤食泰菜,對於比自己更高大的女友,泰臣當街又攬又呵,證明蝦頭係流料!
隨時搞出人命
一直把女友收收埋埋的泰臣,打從近兩年事業有突破,亦開始將另一半掛响口邊,甚至公開話唔排除奉子成婚。
「有傾過結婚,但要有啱嘅時機,依家大家對工作都好有熱誠,可能會生咗仔先結婚。哈哈,女友話 OK喎!其實都冇諗幾時做爸爸,開心就 OK。以前拍拖冇試過好似依家咁安心同踏實,因為大家都完全唔需要對方為自己做任何改變,總之呢一刻已經係最好。」泰臣說。
熱情不減
拍拖八年,正印終於曝光。本刊日前發現泰臣同女友現身九龍城開餐,膚色黝黑、身形高瘦、短髮的泰臣女友,比男友還要高少少,望落頗有「泰妹 feel」。二人撐枱腳食泰國菜隊泰啤,邊食邊笑,非常融洽。
食飽在附近散步,二人十指緊扣巡了九龍城一圈,其間又停低望吓附近一些新落成的私樓,指手畫腳;直至行到去攞車,上車前,泰臣對住女友又攬又呵兼連環掃背,纏綿一輪,才返回司機位開車走。十足熱戀般,唔似八年拖友。
唔識嗌交
泰臣性格樂觀,就算有乜唔開心,亦可小事化無。
「我哋(同女友)嗌唔到交,一嗌交我就會忍唔住同佢玩,我玩時佢又會玩埋一份,有時甚至反客為主,佢仲玩得癲過我。」同女友咁啱 key,難怪泰臣死心塌地。
據身邊人透露,在這 OL女友前,泰臣也曾暗戀過另一女子多年。
「咪睇泰臣笑騎騎冇厘正經,其實好怕醜,佢曾經暗戀一個女仔成四、五年,一直等機會攝位做觀音兵,可惜個女仔始終冇俾機會佢。直至遇到而家呢一個,泰臣成個定晒,不過佢好低調,好少帶女朋友出嚟一齊玩!」知情者說。
掂咗
舞台劇出身、下月滿 41歲的泰臣師承詹瑞文及其前妻甄詠蓓,早年與蝦頭拍住師父師母演出, 07年憑《蛇鼠一窩》獲香港舞台劇協會「最佳男配角(喜/鬧劇)獎」提名;之後再以少少鹹多多趣的《潮性辦公室》,激凸造型成功出位。 10年大膽演出獨腳戲《等待果皮》,憑天賦「口技」及豐富的形體動作一鳴驚人。近年撈過界拍電影,再入埋大台拍劇、做主持,愈來愈掂!
撰文、攝影、攝錄:娛樂組
鍾意就快D Share啦!
|
|