阮兆祥逃出鬼門關 發夢再炒車！
無綫劇《巨輪II》演員阮兆祥前晚揸車途經沙田時撞到貨車，座駕隨即起火燒至廢鐵，幸與同車女友及時逃離，險過剃頭！「劫後」的祥仔如常宣傳劇集，坦言午夜夢迴諗起炒車一刻，故暫不碰軚盤，活動後要坐的士離開！另一《律政強人》演員方中信昨日亦無獨有偶地撞車，齊齊做「黑仔王」！
一波未平一波又起，藝人阮兆祥前晚駕駛綠色平治跑車接載女友到荃灣慶祝女方祖母大壽，駛至沙田新城市廣場對面的公路時撞到前方一架貨車，愛車隨即着火兼冒出大量濃煙，最後嚴重焚毀變廢鐵！幸好的是，祥仔撞車後隨即落車與貨車司機了解情況，女友亦發現汽車起火而及時逃生，兩人未有受傷。事發後，祥仔受訪時就指因情況危急，未能取回留在車上的財物，銀包與手機等隨愛車燒通頂而化成灰燼。
朋友激動到想喊
雖然經歷巨劫，但祥仔昨日仍如常出席無綫劇宣傳活動，但在台上玩遊戲時顯得較平日神色凝重，需要時才頂硬上強顏歡笑。同劇拍檔得知他遇交通意外而紛紛表關心，其中蕭正楠講到劇集未來發展時就半安慰對方、半開玩笑說：「有啲唔係咁開心嘅事！」而祥仔亦故作輕鬆搞Gag回應：「嗰啲唔好提！」
受訪時，連日來兩度因座駕而「出事」的祥仔直言最近是多事之秋：「尋日嘅事令我感覺到戲如人生，呢個不幸同我喺劇中經歷一樣，最後都吉人天相！」又指事後收到不少朋友的祝福與問候，更有不少朋友激動到想喊。講到損失，直言仍未計算的他指稍後會到保險公司處理，如今證件與提款卡燒光，因此已拿取報案紙。祥仔被追問今次炒車責任誰屬，他拒絕評論：「唔想經傳媒去講，因為已經報咗警。（女友定驚未？）最緊要都係人冇事，但尋晚午夜夢迴時都諗番起撞車一剎那。」現以的士代步的他坦言最近不會再揸車，為事件造成大塞車而感抱歉。其後，祥仔再接受電話訪問時問及座駕何以一撞便起火？他也大惑不解：「架車係二手車嚟，但定期有檢查，所以咁樣爆炸真係好意外！聯絡緊有關部門搵答案。」
怕揸車改搭的士
活動後，祥仔匆匆離開步往的士站，期間有女Fans及途人上前邀合照。雖然心情低落，但向來親民的他仍強顏歡笑與途人合照，逐一拍照後才上的士，趕返位於天賦海灣的寓所慰女友。
今年易生意外！
阮兆祥與方中信在不足廿四小時內雙雙發生交通意外，堪輿學家陳子才指兩人今年駕車要加倍小心：「2016年係丙申年，特別容易發生交通意外，凡命格八字內有寅、申、巳、亥嘅人士都需要特別注意。阮兆祥命格有巳及亥兩字，所以炒車不足為奇。」建議祥仔明年農曆一月後才重新揸車較合適。
文：影視組
攝：追蹤組
|
鍾意就快D Share啦！
|
|
|
