樊庚、范根、范發……紅角色名唔紅人嘅張頴康，尋晚於馬來西亞舉行嘅《TVB馬來西亞星光薈萃頒獎典禮2016》勇奪飛躍進步男藝人獎。等咗16年終於有機會踏上頒獎台嘅佢，攞獎時自爆曾放棄演戲轉行做文員，但因一場車禍令佢驚覺自己最愛演戲，因此決定重投演藝圈，幸得太太麥雅緻（Angie）全力撐起頭家…呢番說話感人肺腑，數以萬計網民紛紛激讚！
張頴康邀睇戲追求
回顧一下張頴康同Angie嘅相識過程，話說兩人當年喺無綫結緣，Angie以為正讀緊訓練班嘅張頴康係新人，兩人喺一次偶然機會下結識，識咗後張頴康就膽粗粗約Angie去睇戲，兩人後來感情極速升溫。Angie曾喺訪問中狂讚張頴康好仔，最後被佢嘅真誠打動：「原來佢好早就入行，讀訓練班係充實自己，做嘢好認真！」
麥雅緻慳家有妙計
兩人志趣相投，因此決定拍拖。張頴康曾透露Angie老婆喺其事業失意時仍十分撐佢，因知道佢拍劇收入唔多，所以喺多方面都好慳家，例如：嫌中環泊車貴唔揸車、去海旁拍拖淨係吹吹風行吓石春路、出街拒飲嘢只去便利店買雪糕食、唔愛好名牌包包…Angie除咗夠晒貼地外，仲幾窩心𠻹！聽落真係一啲都唔港女，喺今時今日奉行物質主義嘅社會確實幾難得！
公一份婆一份
兩人拍拖四年後決定步入教堂，婚後冇耐Angie就懷孕。懷孕後Angie冇即時停工養胎，就算佗B八個月仍照開工，喺《東張西望》內擔任主持工作，相當勤力！張頴康曾喺訪問中透露，嗰時孖住陳豪拍劇集《陪著你走》不時搵佢傾湊仔經，陳豪於是落力向佢推介陳茵媺用過感覺幾好嘅陪月員，不過最後張頴康搵Angie商量過後決定唔請，Angie指想由父母代為照顧。由此可見，Angie係幾咁識幫老公慳錢！
下海拍劇養家
婚後兩人育有一女，Angie都有Keep住工作以減輕老公嘅家庭負擔，分別拍過《與諜同謀》、《愛我請留言》、《叛逃、《法網狙擊》、《愛·回家》等劇集與擔任節目主持。
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|