今日「大劉」劉鑾雄同新婚妻子陳凱韻（甘比）一齊出巡，去睇名下深水灣道3道地皮，據知，嗰個地盤將會興建一座獨立屋，大劉更打算稍後轉名畀佢同甘比所生嘅一對仔女秀樺同仲學。消息指，間屋將於明年完工，將會係大劉同甘比一家四口嘅新居，由於大劉特別錫秀樺同仲學，所以好緊張間屋嘅進度，就算醫生建議大劉半年內盡量唔好外出，但佢今日都要落地盤親自監工。另外，見大劉今日精神幾好，據知，已經回復體重嘅佢，遵照醫生建議，要keep番體重，佢喺換腎前行唔到，o依家進展到可以撐住枴杖出門，康復進展理想。翻查資料，深水灣道3號地皮佔地約1.17萬方呎，係由華置（127）大股東劉鑾雄於2011年以8.888億元奪得，並於前年完成1.9761億元嘅補價協議，大劉間獨立屋現時巿值估計約13億元。其實喺今個月初，大劉名下嘅華置（127）先至分完身家，該股宣佈將灣仔肇輝臺12號項目以10.5億港元售予大股東劉鑾雄（大劉）妻子甘比（陳凱韻）、將羅湖商業城一系列商舖，以5億港元售予華置主席、大劉長子劉鳴煒。（新聞連結： http://bit.ly/2hfFtrZ ）而大劉近年送贈給甘比的物業，如山頂歌賦山里道獨立屋、高士美道5號，共同持有則有深水灣道3號，連同甘比私人名下的物業，如中半山帝景園、灣仔壹環、鰂魚涌太古城、將軍澳中心等7項住宅物業，市值合共約25億元。
|
鍾意就快D Share啦！
|
|
|
