阿恆（左）與阿邦（右）把店取名為「稚•居酒屋」，是希望食客能在這裡回到原點，重拾最初，在一整日勞碌下享受他們的日式家庭料理。
壹盤生意
九十後妙計儲六十萬 開居酒屋行《深夜食堂》路線
曾經有香港富二代講過：「後生仔睇少啲戲、去少啲日本，就能夠儲錢俾首期上車。」而身為九十後的黃傲邦及陳偉恆，在過去三年日本照去、戲照睇，每人依然儲到三十萬。「其實儲錢都唔係太軍訓式生活，唔使去到捱麵包日日咩錢都唔花。」對比不食人間煙火的前者，二人未過二十歲就開始從事飲食業，三年來儲錢進度理想，卻志不在買樓，反而在三個月前一擲五十多萬在元朗開了「稚•居酒屋」；開業初期不但達到收支平衡，每月更穩袋五萬元，令簡單的日式住家料理「貓飯」成為熱賣。對比還在唸書的同齡年輕人，腰繫圍裙的二人指無悔走此路，「如果讀一科無興趣嘅，或喺無意思去投身嘅行業，不如早啲出嚟做嘢，搵屬於自己嘅方向。」
儲錢講規劃非死慳
問到過去三年如何生活，有否慳到連旅行都不捨得去時，年僅廿一歲的阿恆與廿三歲的阿邦異口同聲回應：「梗係無，我哋都有去日本同台灣！」環顧開放式廚房設計、只有三百呎的居酒屋，這裡的一枱一櫈也是出自二人多年來的積蓄，丁點也沒靠「父幹」。「其實唔使太刻苦耐勞，只係有啲嘢你無得再成日買，例如我要戒咗儲波鞋一樣。」畢業於中華廚藝學院、投身社會已有一段時間的阿邦解釋。同樣從事飲食業、以往在酒吧做調酒師的阿恆指出，會規劃每天使費在一百元之內，如某些日子約了朋友玩樂或計劃去旅行，就再多除少補。「以前返夜班人工會較高，有萬七至萬八元，因公司包食，所以我日常使費就喺交通上，大約二千蚊，另外四千蚊俾家用，再有三千蚊喺日常消費，剩番一萬蚊就會儲起。」說到尾，儲錢跟做人一樣要講平衡，不能只剩下生存而沒有生活。
業主欣賞自願減租 裝修被呃廿萬
他倆以二十出頭之齡創業，兩顆初心有人賞識也有人利用，一切絕非一帆風順，而第一關要過的就是找鋪位。「我哋一心想搵二百五十呎嘅鋪位，一嚟因為資金有限，二嚟想同客人親近啲，唔想被廚房同樓面所分隔。」阿恆以日本家庭式的居酒屋為開店藍圖，但香港地鋪面積普遍也在他們目標之上，結果大大超出了其租金預算，曾一度想放棄的二人最終在戲劇性的發展下，落腳於近朗屏西鐵站的一個三百呎鋪位。「我哋向業主介紹咗理念後佢好支持，於是將租金減咗一成半至二萬一千元，喺一年死約後先回升原先開嘅價位。」不願上鏡的業主余先生指：「咁後生創業好難得，唔想因為鋪位問題而阻攔到佢哋。」第一關雖在富人情味的結局下順利通過，但卻在第二關裝修時撞板被呃。
「當時我哋搵咗間喺網上見到嘅公司，佢話包一條龍裝修及出牌，點知接近交貨日子時都未睇到完工嘅日子，於是我哋就開始驚，搵咗另一間公司上嚟睇，一睇就知大件事。」原先的公司只把他們的餐廳作一般家居裝修處理，無論是門高或廚房設備等全都不合出牌規格。中了「大伏」的二人立即更換公司收拾殘局，雖然業主願意加長免租期，但最後也延遲了開店日子，總共花了四十萬才完成裝修。額外花多二十萬之經歷可謂痛到入肉，但二人卻沒怨天尤人，阿邦只輕托眼鏡道：「其實翻查記錄就知佢哋係慣犯，有一部分都係因為我哋無睇清楚信錯人。」
半島學廚出身 《深夜食堂》貓飯成熱賣
踏上廚師之路已超過五年的阿邦，在選擇中三輟學與面對裝修被呃一樣，同樣有承擔。「當時屋企人當然反對，認為至少要有中六學歷，但問題係我深知自己非讀書材料，點解唔快啲搵出自己喺社會嘅定位。」不依從家人決定，決心由揸筆讀書轉到揸鑊鏟，阿邦從中華廚藝學院畢業、到過中環鏞記酒家學師，再到半島酒店嘉麟樓跟鄧聰能師傅學廚，除了練出一手「老鼠仔」外，更學懂了對食材有所要求，在最基本開始把關。
「炸蠔選用日本廣島蠔，而甘栗子薯餅同樣都係從日本入貨，因為試過國內生產同日本生產真係有很大分別，呃唔到自己。」現時店內設各款咖喱、定食及小食串燒，餐牌三版望晒，午市定食另設學生優惠，只收四十元就有整個連味噌湯的套餐。食物款式雖然不多，但阿邦每朝九時就回去備料。「我們嘅咖喱融合咗甘口同辛口兩種味嘅日本咖喱磚，另外會加蘋果蓉入去，帶出自然嘅甜味。」
食客譚先生指看到《食在元朗》的網民推介而慕名而來，點叫了鰻魚定食、關東煮及招牌貓飯。「佢哋態度好好，關東煮都夠入味。」二人坦承食店在被推介後曾一度爆場，門口現二十多人的人龍，但深知熱潮終會過去。回歸基本，他們最着重的是日本的住家料理，而當中更設曾出現在日本著名漫畫《深夜食堂》的貓飯。「其實貓飯即係醬油拌飯，入面有牛油、日本醬油、紫菜絲及木魚花等。」材料不複雜，是日本的傳統飯食之一，卻意外深受食客歡迎成為店內熱賣。
廚房內外合作無間 家人義務幫拖
對比阿邦，阿恆每天會遲兩小時回鋪頭，他並非偷懶，而是二人定位分明。「我哋嘅分工係廚房內同外，佢專心煮食，以外嘅包括請人、樓面等全包在我身上，所以每晚佢搞掂完廚房嘅嘢我會叫佢早啲返去休息，我會埋完數先走。」店內除了有一名全職及兩名兼職員工，每到午市更會出現另一名女士的身影，細問下才知是阿恆的家姐。只比阿恆年長三歲的家姐 Connie微帶嘲笑道出：「我都無見過有人清潔廚房要擦成兩個鐘，佢哋真係好誇張！但我諗正因為佢兩個事事有要求，啲客先會再嚟。」
當初決定不再升學，阿恆家人如阿邦的反應一樣，但到今時今日， Connie已改變想法。「佢雖然得廿一歲，但好有心，就算真係做唔到落去都可以從頭開始。」雖然開業撞板，但二人其後愈走愈順，更預料年半時間就可回本。「平均閒日有四至五千元嘅營業額，假日可以去到六至七千元。」調酒師出身的阿恆表示，未來希望引入香港本地的手作啤酒，真真正正令「稚」成為一間具本地特色的居酒屋。
營業資料（ 11/16）
營業額 $150,000
入貨 $50,000
薪金 $27,500#
租金 $21,000
盈利 $51,500
#包括一名全職及兩名兼職薪金
開業資料（ 10/16）
租金上期 $21,000
按金 $63,000
貨存 $7,500
裝修 $400,000
廚具及餐具 $10,000
出牌費 $15,000
總投資 $516,500
撰文：黃綺敏
攝影：梁正平
攝錄：廖健昌
ed_bn@nextdigital.com.hk
|
鍾意就快D Share啦！
|
|
|
