Miranda不是刻意選擇單身，只是生活圈子和工作環境上，未遇到適合人選。當這個人出現時，她也想拍拍拖，甚至結婚。
城市打游擊
嫁唔出 又如何
相愛很難，但要尋找生命中的另一半，其實也不容易。不是每個人的愛情路也順利易行的。有些人即使苦心等待，緣分總是沒有降臨。到頭來，還是自己一個人。
最近，不少女網民在討論區出帖，都慨嘆自己已經年過三十到了適婚年齡，仍然未找到男友拍拖，還是孤單一個人。她們都擔心年紀愈大，找到愛侶的機會愈來愈細。結婚？可能更加渺茫。有人甚至覺得，到了適婚年齡還未嫁得出，會是一種羞愧。
未拍拖未有男伴，真的這麼可悲？本刊訪問了三名年過三十和四十歲、單身了多年的女子。過去，她們都曾在愛情路上努力過，用盡各種方法，希望找到生命中的另一半。但尋尋覓覓兜兜轉轉，總是撲個空。緣分這回事，就是這麼奇妙，總愛捉弄人。
不過，即使未有愛情還未結婚，她們亦不當是一回事，因為單身一個人，也可以活得很開心。有人覺得可以自由選擇自己喜歡去的旅行地點，玩危險的玩意；有人就一個人長途跋涉跑到倫敦，參觀心愛球隊的足球場；有人又覺得即使沒有伴侶，至少還有家人和朋友""
嫁唔出，其實一點也不悽慘。因為一個人，也可以好好地過日子。
有些人的愛情路上，可能欠缺了運氣，總是不能順順利利。即使努力付出過，也未必有收穫。
今年四十三歲、任職行政主任的 Miranda，自四年前跟拍拖七年的男友分開後，一直都是單身，「唔係我刻意選擇單身，亦唔係我要求高，而真係未遇到合適嘅人。如果有理想對象，當然都想拍拖。」她慨嘆生活圈子狹窄朋友不多，男性朋友更多已結婚，「工作方面，都冇適合嘅人出現。」她又說這幾年來一個人，有時也會感到寂寞。
家人冇催我結婚
Miranda慶幸家人和朋友也不會給予她壓力，「家人思想好開通，唔會催我快啲搵番個男友，我有兩個妹，年紀都係唔細，一樣未拍拖。而我嘅女性朋友，好多同我差唔多年紀，多數都未結婚，所以冇乜壓力。」
但每當看到朋友結婚，總會有一點兒感觸，也希望自己有一天能走進教堂，「因為有個伴侶跟你分享係開心事，但呢個人一定要跟你有共通點，價值觀及視野都要相似。」但 Miranda笑說，年紀大了，擇偶條件也降低了，「其實已經冇乜要求，只要係一個好人就得，哈哈哈。」
參加交友活動
Miranda坦言，這幾年來也有參加過 Speed Dating的交友活動，但每次都失望而回，「我覺得參加者質素太參差，可能做朋友可以，但唔覺得大家有共同話題，唔可以進一步發展。」她亦知有些交友網站，是專為中年男女提供服務，成功率應會高一點，「但我又唔太想參加呢類網站，因為好似標籤咗中年，自己心理上好難調整。」她的手袋裡，亦放了一本運程書，「有方法教你點樣催旺姻緣，好似擺乜嘢物件同位置，試吓有冇效囉。」
兜兜轉轉，現在還是一個人，她說也會感到氣餒，「都有幻想過老咗一個人嘅畫面，尤其當你脆弱時就會咁諗。」 Miranda又說已為將來作準備，「會為自己打算，例如儲一筆錢，以及尋找自己喜歡嘅興趣，好似關心環保同保護動物呢幾方面。」
我唔好彩囉
不過， Miranda不會因為「嫁唔出」而羞愧，「都唔關其他人事，呢個係我嘅生活，別人鍾意點講就點講。」她認為即使年紀大了仍未遇到另一半，是緣分問題，是不能控制的，「唔需要自責，我只會怨唔好彩。」她又呼籲其他女士，不要因為心急結婚，而求其找一個人，「唔可以因為太悶、冇人陪，就求其搵一個伴，咁係一個更大嘅錯誤。」
她又說現在不少人也是遲婚，就算嫁唔出，女人單身亦可以活得精彩，「單身嘅好處就係自由。因為一個人，你會更加留意自己鍾意同關心乜嘢，你會俾自己多啲時間。」 Miranda又十分享受一個人去旅行的感覺，「我只需睇自己時間，唔需要遷就其他人時間，地點我自己定。最主要係冇負擔，即係我唔需要為別人嘅生命負責，所以去旅行想玩一啲危險活動，都可以自由去做。」單身的自由，確是難能可貴。
女人四十係死線
任職升降機公司文職工作的 Cindy（ 42歲），自言單身了多年。這些年來，她在愛情路上也曾主動努力過，「相睇或者配對交友活動，好多都試過。」可惜，全部都不成功， Cindy分析可能是母親訓練她獨立，令她性格太剛強，嚇怕了異性，「可能有時唔覺意做咗啲嘢嚇怕人，之後我自己作結論，應該又講錯說話。」
Cindy表示，自從踏入四十歲後，她對愛情已經半放棄，「年紀係主要因素，尤其係香港，女人一到四十歲就好似一條死線。我覺得女人一到呢個年紀，真係好難搵到伴侶。」她認為不要刻意為了結婚拍拖，而找一個不適合自己的人，這樣更不好。
她說家人從不會問她這些事，「我身邊嘅人從不會俾壓力我，我喜歡做咩家人都會支持，只要我鍾意就得。」而朋友和同事，亦很知情識趣，從不會問她的感情問題。有時候，她甚至會在人前自嘲嫁唔出，「我自己先講出來，自己先講會較好，即係快人一步，先封住別人把口。」
唔結婚唔係悲觀
雖然 Cindy說若將來遇到夾得來的人，還是會結婚，但她覺得機會不大，「我唔覺得咁樣叫悲觀，因為依家嘅女人，同上一代好唔同，唔一定要結婚生仔嘅，我哋可以選擇過單身生活。」她又說一個人也未必會寂寞，因為可以發掘自己的興趣，做自己喜歡的事情，「早排我一個人去倫敦，參觀阿仙奴個主場。」一個人，是可以很任性的。
Cindy坦言將來很大機會單身過活，但從不擔心年老後無人照顧，「我又唔擔心，經濟方面我可以應付到，依家會較為注重健康，始終年紀大咗，身體各方面都會開始差一點。所以我依家考慮到嘅，係注重健康。金錢方面，我就唔會擔心。」
單身了四年多的空姐 Annie（ 32歲），雖然樣貌標致，但愛情路上還是未有着落，「可能我少出街，少咗好多機會。因為你冇出去，就冇可能認識人。但冇辦法，我份工時間比較顛倒，少咗參加社交活動。」負責飛歐洲線的 Annie，經常也不在香港，認識異性的機會也少了。而且，她亦不想當男人的花瓶，「好多男人追空姐，可能佢哋對空姐有幻想，並唔係真心，所以我會有戒心。」
爸爸安排相睇
Annie憶述當初失戀時，也有為感情心急過，「之前有段時間都着急過，因為當時都就快三十歲，有想過不如降低自己要求。」而爸爸和一些世叔伯，更不時說要介紹男仔給她相睇，「其實要搵一個喜歡自己，以及可以跟你長遠相處嘅人，真係唔容易，所以唔應該太着急。」
對於愛情， Annie現在覺得順其自然較好，「我唔怕嫁唔出，因為我覺得自己唔係太差，當然就算自己條件唔差，都唔一定有人要嘅，哈哈哈。」即使真的沒有緣分，她覺得一個人也可以，「冇所謂嘅，其實最重要自己開心，以及對得住自己，唔好呃人就可以。」孤單一人，會否寂寞呢？「最多半夜有咩事自己照顧自己，聖誕節情人節同屋企人過囉。」
我唔係剩女
Annie又認為，女人即使到了適婚年齡還是一人，也不需要羞愧，「我覺得唔需要咁樣，我從來都唔覺得自己係『剩女』，因為我唔係剩落嚟嘅，係父母送俾我最獨特嘅東西，所以我覺得唔應該為冇伴侶而羞愧。」她說女人嫁唔出不是最慘的，「起碼我哋仲有朋友，仲有家人。」
這一代的女性，真的很剛強硬淨，即使沒有愛情沒有婚姻，就算孤孤單單一個人，也可以瀟瀟灑灑地過着自己喜歡的生活，一樣會很精彩。
撰文：程志康
攝影：王晴
news@nextdigital.com.hk
|
鍾意就快D Share啦！
|
|
|
