原先在家族鐘錶生意中幫手的 Kevin，當初曾研究過手帶及頸鏈等，但後來發覺戒指是最方便攜帶、骨傳距離又最短的飾物，最終研發出智能戒指 ORii。
Start up擂台
「戒指」耳骨傳音 手篤耳窩通電話
今時今日，低頭族橫行，手指在屏幕上一掃一按，「理想」即時達到，對尋常用家如你我，手機有幾普遍同「萬能」，不必冗贅。不過，手機對視障人士而言，卻是一項挑戰，沒有了按鈕的觸感，他們能依靠的就只有電話中的發聲功能，須不停地來回掃屏幕、再等電話「告訴」他們接觸到的是哪個 app。 Origami Labs聯合創始人黃家恆（ Kevin）受到失明父親的啟發，研發了結合「骨傳」及藍牙 4.0科技的智能戒指 ORii，用家只需「神指一按」觸碰耳窩，即可透過震動讓手指代替耳機進行通話及聲控，以脫離被屏幕掌控一切的生活。
TalkBox創辦人郭秉鑫（ Sunny）在本擂台擔任專家已有一段時間，好有霸氣、說話又出名單刀直入的他，今次竟說：「我很少會讚成咁，其實我無咩想挑剔！」更給予九分之高分。其於 2011年創辦的 TalkBox是全球第一個語音傳訊的通話 app，卻在後來被內地巨大科企「後來居上」，深受心血被人攤分之苦的他，道出了 ORii戒指最大的潛在問題，「你只推出硬件的話，喺兩、三個月後會發現點解會有個『大米』嘅相同物品出現？一定會有人這樣做，我可以肯定！」到底 Kevin又可如何避免抄襲問題？
我點 sell? 世界不用再被耳機長期隔絕
「視障人士嘅聽覺就等如佢哋雙眼，如果單邊或兩邊聽覺被耳機所封閉，對周遭世界嘅感覺就會因此少咗一半。」在香港出生但兩歲就移民美國的 Kevin操着濃濃的「 ABC」口音說。智能戒指 ORii以藍牙功能連接手機，再透過骨傳導技術，以震動傳播聲音，用家只要將佩戴戒指的手指輕觸耳窩，就可進行通話，而它跟藍牙耳機最大的分別是不須長期佩戴。「我們不單係俾視障人士使用，而是受到佢哋啟發學習到一件事，就係如何脫離屏幕。」 ORii戒指除了可用作電話通話，同時具備咪高峰功能，可聲控發短訊或進行地圖導航，從而令「低頭族」重新抬起頭來。而骨傳震動傳音的方法更可確保私隱受到保障，外人不會聽到當中內容。
擺脫家族生意 延續父親科研精神
「我大學讀政治，喺美國政府打咗幾年工後，就被叫返嚟幫家族企業。」今年 28歲的 Kevin回港打理九龍錶行集團，更到科技大學修讀 MBA，意外認識到兩名同學，創立了 Origami Labs。「當初只係當 project功課形式去做呢隻戒指，後來覺得唔應該浪費，就想全面發展。」由修讀政治到從商、再躲於實驗室研究各種零件的骨傳效果及穩定性，他靠的除了是不怕失敗地自我鑽研外，更重要是得到從事軟件研究多年的父親支持。
「我爸爸非天生失明，係於十三歲嗰年先盲。但佢無被呢件事打敗，仲到英國劍橋大學進修電腦，後來於美國微軟發展可發聲嘅電腦，成為香港差不多首個識得程式及代碼嘅失明人士。」而父親支持他的方法，簡單得很，就是要他有自我承擔。「我想脫離家族生意，或想發展個人事業，喺籌錢、請人及同家族解釋上，佢都要我自己做，要我自己承擔番失敗嘅後果。」 Origami Labs最終於本年中成立，現時以硬件公司進駐數碼港進行研發。
有成品才眾籌 拒做「吹水」公司
提及早前勝出了一分鐘環球電梯募投比賽的經歷， Kevin指投資者要看的，是參賽者能否以其能力，把事情變成事實。「喺嗰一分鐘，佢哋睇嘅唔係產品同理念咁簡單，呢班投資者好有見識，佢哋想知嘅係你嘅為人。」貫徹此想法，他拒絕在產品未成形就進行眾籌，相反在戒指初始階段時已「不怕樣衰」地向各個失明人士組織合作進行測試，收集意見。「現時大概籌到十六萬美金嘅資金，首輪目標係四十萬美金。」他指首批將會生產十至十五隻，預計一七年一月到貨，然後才會考慮放上眾籌平台。「到時我哋想眾籌幫到嘅，係將我哋產品由十隻變成生產一萬隻。」
Kevin爸爸黃錦豪（ Peter）可算是 ORii戒指的靈感源頭，他指：「以前我喺微軟做嘢時，會有『 Bring your child to work day』， Kevin嗰陣已經跟我返公司，所以對於佢行呢條路我並唔感到意外。」並分享平日用智能手機的第一身感受，「平日條街人很多，我哋要保持聽覺靈敏留意環境，個電話震時未必聽到感受到，相反戒指在手指上震就比較易發現。」
而香港失明人協進會項目協調主任劉誠君指，其會員一直幫 ORii戒指進行測試。「藍芽耳機我見視障人士就真係少用，佢哋大都係用有線耳機，係因為唔希望俾人聽到佢哋電話講緊咩。」他指接受過產品測試的會員也一致好評。「例如落雨時，佢哋要撐傘又要戴耳機，隻手又點再去控制個電話呢？所以對於視障朋友嚟講，件事可以一手辦妥會好好多。」
專家意見：唔好放上眾籌網要推就要整個平台咁推
十分滿分我會給九分，在技術上我剛才試了是十分好，清晰度當然可有待進步。我的建議是，想一想如何去發展你獨有的軟件平台，例如建立一個即時通訊平台，做到擁有自己系統的設備才可提高對產品獨特性的保護。如單搞硬件，就一定會有人抄襲，以及你無任何東西去留得住你的用戶。體驗要一體化，就以 Apple為例，它是軟硬件並行，如果單是軟件好像 Google那樣，就會變成現在全部用 Android手機，失卻了原有意義。
這產品具有很多可能性，不需太快公開。因此不要放上 Kickstarter進行眾籌，盡量把細節保密，不要通天。到件事真的可行時，才當 Kickstarter是宣傳的方法，告訴別人已成事，那時一推出就能引起回響。
撰文：黃綺敏
攝影/攝錄：關永浩
ed_bn@nextdigital.com.hk
|
鍾意就快D Share啦！
|
|
|
