李嘉欣、許晉亨同囝囝小 JM，一家三口出發去北海道過白色聖誕。
名人動態
滯留三日 兩工人一助手陪去日本 李嘉欣大陣仗
正值出埠度假黃金時期！早個星期五（十二月十六日），輪到李嘉欣，趁住寶貝仔 Jayden Max（ JM）學校放長假，一家三口加兩工人一助手，起程去北海道過白色聖誕。
點知撞正當地大風雪，回程時，被迫滯留當地足足三日，至本週日（廿六日）零晨才順利返港。
慶祝八周年
一向鍾情日本的李嘉欣，上個月先同老公許晉亨去完東瀛遊過二人世界，慶祝結婚八周年，還遇正初雪，勁浪漫！隔唔夠一個月，兩公婆又出發去札幌，不過今次預埋囝囝，家庭樂。出發當日，李嘉欣、許晉亨同小 JM，上午八點已經到達機場，一家三口手拖手行去 check in櫃位，兩個工人姐姐就幫手拎行李。五歲大的小 JM手長腳長，明年就升小一的他，長得勁高大，已經去到媽咪心囗，眼大鼻高，五官似足大美人媽咪！
之前霍啟剛同國寶老婆郭晶晶帶住囝囝去美國，冇工人傍身，霍公子做阿四服侍妻兒。相比之下許晉亨同大美人出門就大陣仗得多，一家三口，連同兩個工人姐姐，再加一個助手出發。三對三，貼身服侍！
唔俾打尖
許晉亨發現記者後，立刻同老婆打個眼色，李嘉欣拖住小 JM同男助手行去入閘，許晉亨就同兩個工人姐姐殿後。其間，小 JM心急想打尖，李嘉欣即刻捉住囝囝，示意他要守秩序排隊。臨入閘，閘口職員循例要求李嘉欣除低黑超對護照，李嘉欣合作照做，素顏一樣咁靚，怕乜！
一家大細去旅行，點知遇上北海道五十年來最大風雪，搞到要滯留當地三日，美中不足！
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
