投資七位數開素食健康食品的陳貝兒，短短兩年已擁有四間分店。
名人動態
2年開 4鋪 陳貝兒開健康食品店搵私己
父親是資深演唱會監製陳永鎬，老公家底又不俗，嫁得好的陳貝兒大抵可以 high tea行街過日辰。但不甘只做闊太的 Janis（陳之洋名），轉投大台做主持外，還利用工餘時間，將自己的素食習慣變成事業，開設素食健康食品店，短短兩年已經開到第四間分店。
日前趁住電能車 Tesla有新款落地， Janis抽空去睇真身之餘，順道殺落灣仔開設的首間鋪頭巡鋪，遇上店員入倉補貨，做老闆娘的還落手搬貨兼收銀。 Janis這門賺私己錢的生意，絕對不是柴娃娃玩泥沙。
巡鋪做埋一份
轉投大台後，陳貝兒主力擔任大騷，以及每星期一晚的《東張西望》主持工作。上週五（二十五日）中午，一身牛記打扮的 Janis現身灣仔皇后大道東，她施施然行入一間素食健康食品店，起初見她向店員問長問短，以為她準備入貨，但不久後，見她放低手袋，捲起衫袖，起勢將貨物左搬右搬轉擺位，其間有客人俾錢， Janis二話不說行入櫃枱做收銀，轉頭一名外籍客人上前查詢， Janis帶着對方在店內遊走介紹產品，在鋪頭逗留大半小時，直到客人相繼離開， Janis才孭袋走人。
密謀再開鋪
事後向陳貝兒電話查詢，她直認店鋪是自己有份投資的，表示因為成為社企 Green Monday的執行總監後，萌生將自己由大學時已開始的素食習慣，轉化成為生意，於是同幾個志同道合的朋友，開設素食健康食品店，短短兩年時間，已經擁有四間分店，坦言灣仔店是首間開設的，份外有感情，只要稍有空閒，便會前來巡視。「落嚟睇吓客人有咩喜好，嚟緊再開新鋪，可以攞多一點客人的意見。」陳貝兒說。
至今陳貝兒已經投資了七位數字，同其他小商戶一樣，鋪租是整盤生意中的一大棘手問題，但無阻 Janis同一班拍檔將生意繼續擴張，計劃待新開的兩鋪漸上軌道，稍後便會在西貢以及元朗等新界地區開新鋪。
想老公送車
投資的生意有成績，未巡鋪前，陳貝兒走入 Tesla睇新到埗的 Model X，據知新車八十萬走唔甩， Janis入到車行雙眼未離開過部新車，問 sales攞晒價單之餘，又坐上司機位試揸，似乎愛不釋手，當事人承認對新車好有興趣，還笑笑口話：「希望老公見到識做」老婆俾貼士俾到出面，陳貝兒老公係時候做嘢喇！
阿太升呢做老闆
無綫出名人工奀，但無阻一班財力過人的阿太級藝人，創業做生意搵真銀。
撰文、攝影、攝錄：娛樂組
|
鍾意就快D Share啦！
|
|
|
