今日財爺曾俊華辭任財政司長，明顯係為選特首舖路。黃秋生喺選委會文嘅選舉落敗，不過佢依然樂於發表意見，雖然目前為止只有胡官胡國興表態想參選，對於其他三位疑似入閘人士曾俊華、葉劉淑儀同林鄭，秋生都有獨到嘅分析。秋生接受《蘋果》電話訪問時稱，認為薯片叔叔曾俊華好有人緣：「佢都好受歡迎呀，如果我唔覺意入咗去，可能我都會投佢一票。曾俊華整體幾好，唔乞人憎，好nice。」不過講最後，都係要踏實啲睇番曾俊華政綱；至於應承咗會否「走數」？秋生話：「一個人講唔講大話唔知，你睇全世界政治人物個個都走數，睇走多走少。如果應承十樣做到三樣、五樣已經好好。」講到另外兩位疑似特首候選人林鄭月娥同葉劉淑儀，秋生就稱：「林鄭同葉劉呢……我個人好迷信嘅，讀書唔多，我就唔會揀一個畀麒麟籮柚bell開嘅人，大吉利是呀，大佬，麒麟籮柚喎，係bell到飛起喎。中國人吖嘛，新年流流唔老嚟，你敢唔敢棟吖？林鄭就似樣，呢個人忍得呀，而且完全有行政經驗，林鄭同曾俊華就各有各fans。」
來源 source: http://s.nextmedia.com
|
鍾意就快D Share啦！
|
|
|
