由彭浩翔執導、楊千嬅同余文樂主演嘅新片《春嬌救志明》連日嚟都喺度趕戲中，日前佢哋喺中環海旁拍外景。當晚10點零左右，見到佢哋拍住近日憑大台劇《巨輪II》做獸父而人氣急升嘅吳岱融，以及老戲骨秦沛喺度拍外景。當中最搶眼嘅，一定係男主角余文樂，話晒踩入時裝界、身為潮服品牌主腦嘅佢，着住一套粉紅色連身衣褲，胸前有兩個大心心圖案，佢仲戴住頂好似小紅帽，個look同《小雙俠》個「小雙俠2號」上成愛有99%似！（係爭個眼罩啫！）當晚嘅場口應該係擔住口煙嘅吳岱融，喺車上等，而佢幾個手下就圍住好鬼cute嘅余文樂，似想爆樽咁樣，喺呢個時候，千嬅就好似大家姐咁衝出嚟喝止。全程拍咗3、4個shot，喺唔使埋位期間，幾位演員有講有笑，氣氛好好。拍咗一個鐘多啲，大隊就順利拍完離場。據知，佢哋嗰晚接住落銅鑼灣，都係拍街景。男主角余文樂被《蘋果》問到個《小雙俠》造型，佢話要保持神秘，唔可以穿橋住，但佢就話自己好開心可以拍到《春嬌》系列第3集：「因為自己好鍾意呢個系列，希望可以拍落去，好難得，但唔知呢集係咪最後一集。」佢又話其實自己拍3集都好，每集都有少少唔同：「每一集都係講春嬌同志明兩人之間嘅相處、喺現實生活中要面對嘅問題，我覺得呢部戲同個角色，好似同所有香港人一齊成長咁，呢對情侶喺3集裏面遇到好多唔同嘅問題，要睇佢哋點樣解決，可能好多情侶都面對過，所以大家有共鳴。」至於導演彭浩翔接受《蘋果》電話訪問時透露，套戲預計拍到聽日就煞科，佢話：「今次係三部曲之中，覺得最好笑嘅一部，會有好多新嘅搞笑元素喺入面。」
| 採訪、攝影：梁繼光、朱志聰 | | |
| | | |
| | | |
|
鍾意就快D Share啦！
|
|
|
