以「童顏靚聲」見稱的無綫藝人張彥博（阿博），演出無綫劇《一屋老友記》「細寶」一角成功彈起，人氣上升的他原來背後歷盡財困辛酸，出道捱足十六年仍然窮到燶！他直言其銀行戶口曾經長期一百蚊都冇，出門開工搭車都冇錢，搞到要問家人借錢搭車！阿博說：「戶口成日撳唔出錢，冇工開就匿起屋企。」阿博坦言窮到燶的日子令他自我厭惡到曾有輕生念頭，更一度懷疑自己患上抑鬱症：「咁大個人仲問屋企人攞錢係種屈辱，我當時好憎自己，曾經想輕生，亦懷疑有抑鬱，好彩有信仰一路支撐住我先無事！」他大爆擔任過各種基層工作，例如派傳單、茶餐廳侍應、救生員、電腦維修員等等，他說：「我咩工都做過，特別做咗九年室內池救生員，仲兼職派傳單，不過我當全職咁日日派！（財政拮据持續幾耐？）從來都拮据，我依家都拮据緊，只係娛樂觀眾係我夢想。」
膽粗粗考藝訓班
樂隊出身的阿博直言全靠樂觀性格面對抨撃聲音：「我廿幾歲想做歌手，組成過樂隊後自己再參加全國歌唱比賽。之後自己敲門參加無綫藝訓班面試入嚟。（過程中想過放棄？）自得其樂。（被人抨擊？）一定有，屋企會叫我『醒』唔止家人，身邊同學有晒事業，我仲好似發緊夢。但家人最後都有支持我，仲有信仰。」
同拍拖四年女友分手
目前單身的阿博透露早前與交往四年的圈外女友分手，只因自覺無法給予對方未來而分開，認真慘慘豬！阿博稱有車有樓才敢娶老婆：「一個男人畀唔到將來人哋，女仔屋企都會驚。我得幾千蚊個月，有錢就投資晒樂器，另一半好難捱。所以我想有樓有車先接個老婆返嚟。如果咩都唔使你付出，由我做晒咁咪好囉！我寧願所有嘢都畀晒你，咁就唔使唔開心。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
