人人問曾生 拖馬賽最棘手
曾醒明任職無綫公關多年，解決過不少轟動全城事件，曾與他共事過的舊同事、傳媒及藝人，有好多問題想發問，曾醒明逐一解答！
Q1楊思琦：
協助過咁多藝人解決問題，有邊一個藝人問題同埋事情令到你覺得最棘手同最印象深刻？
曾醒明：
馬賽事件（艷照事件記者會），我叫佢唔好驚，拖住佢出去，後來被人寫我拖佢出嚟傳緋聞，件事令屋企人有啲唔開心，問我點解要拖住個女藝人，咁我覺得係工作一部份。
Q2陳倩揚：
之前有冇人試過高薪挖角你係心動過呢？
曾醒明：
我有四度辭職，有次口頭承諾馮美基去有線做公關總監，但當時我上司潘啟迪猛同何定鈞叫我唔好走，何定鈞打畀馮美基話：「你搵乜人都得，但搵曾醒明就唔得！」我最後決定留低都冇同公司講條件。
Q3前資深記者二寶：
多年公關生涯中，有冇試過一件事令你好難忘、令你飽受打擊？
曾醒明：
一定係「威遠行動」（即陳志雲事件），電視城係史無前例做封城行動，我嗰次作出果斷決定，要求行政部搬兩個流動廁所、帳篷、椅凳、早餐、午餐、下午茶照顧傳媒。
Q4前資深記者車輪：
2012年港姐決賽死機事件，你要公開道歉，嗰次係咪公關生涯中最難堪一次？
曾醒明：
當時冇諗到難唔難堪，我哋一定要話畀全香港同讀者知道，TVB係一個負責任嘅電視台，所以毅然作出鞠躬，我覺得呢個係榮辱與共，唔希望公司形象受損。
Q5無綫外事部前同事唐國忠：
有冇一件事如果畀你從頭再處理過，係會有唔同處理方法？
曾醒明：
都係2012年港姐事件，正如傳媒問我係咪好難堪，我自己夜闌人靜問自己，係咪真係第二日就鞠躬？等多24小時畀件事發酵，會唔會有轉機？
來源 source: http://hkm.appledaily.com
|
鍾意就快D Share啦！
|
|
|
