38歲、台灣九頭身女星吳佩慈三年抱兩，為內地百億富商男友紀曉波生咗一仔一女，湊夠一個「好」字。雖然兩人遲遲未拉埋天窗，但男友一直好照顧吳佩慈，去年底以吳佩慈名義入股怡益控股，當時股值約3億港元，令女友唔使為生活擔憂。日前(1月7日)下午3點幾，記者發現吳佩慈一家四口去中環AIA嘉年華。吳佩慈同2歲囡囡小蕊蕊(Hillary)着住pink colour母女裝，現場發現有四名保鏢，位位昂藏六尺高，三人以「品」字型列陣護主，另一人則四處張望視察周邊環境，十分誇張。一對仔女同紀曉波都生得好似樣，話晒囡囡係爸爸前世情人，見紀曉波特別痛錫囡囡，買完雪糕畀阿女，跟住就抱住佢周圍玩，掟完公仔就去睇迪士尼主題4D動畫，之後再抱埋歲幾大嘅細仔一齊騎木馬。吳佩慈生得手長腳長，單手扶柱，另一隻手就扶住騎另一隻木馬嘅囡囡，而紀曉波就攬住囝囝一齊騎，一家四口場面好溫馨。玩到大約5點鐘，一對寶貝仔女開始有啲攰，於是就放上雙人BB車，最初由紀曉波負責推，但始終係生意人，秒秒鐘可能幾廿萬上下，紀曉波不時都要講電話，之後索性將BB車交畀保鏢嚟推。講完電話之後，紀曉波拖住女友吳佩慈隻手「揈下揈下」咁行返去四季酒店，沿路有唔少人認得吳佩慈，但佢哋都冇理，繼續行返酒店。
| （攝影﹕追蹤組） | | |
| | | |
| | | |
來源 source: http://s.nextmedia.com
|
鍾意就快D Share啦！
|
|
|
