現年38歲嘅藝人林雅詩（Grace）近年同老公溫文英因離婚一事對簿公堂，前日Grace突然喺社交網站自爆被趕出家門兼想跳樓，同時亦有讀者指目睹佢危坐窗邊，之後老公拉番入屋發生爭執，事發後仲失去聯絡，好再佢之後經理人馬天樂同大家報平安。
飽受負面情緒嘅Grace，尋日下午終於現身，見佢喺九龍區某商場表現憔悴獨自一人漫無目的咁行街，全程都冇乜笑容嘅佢，經過一間文具店嗰陣，突然慢腳步入內選購文具，大約逗留約半小時後，再轉到一間童裝店，似乎為仔仔置裝及添新文具迎接新年。之後見Grace會合經理人兼緋聞男友馬天樂飲咖啡訴苦，過咗大約一個鐘便到停車場拎車。
喺Grace拎車期間，記者上前問佢喺社交網站自爆想跳樓嘅事，Grace承認有此事：「尋日情緒有啲難控制，喺Facebook講咗啲嘢，令大家擔心。（有跳樓念頭？）係...因為嗰刻我返到屋企同我先生商量緊個仔嘅安排。（讀者爆料話你危坐窗畀老公拉住啵！）係有件咁嘅事。」
承諾唔會再做傻事
問到Grace點解咁激動？Grace爆喊話當時聽到侮辱性說話，佢話：「我一直好努力做好媽媽呢個角色，佢說話好侮辱到我，我唔想個仔唔開心，我想釋放出嚟，所以做咗少少激動嘅嘢。（朋友擔心你！）好多朋友都支持我，但女人面對嗰個問題，我覺得好辛苦。係人都知我好錫仔仔，我好努力搵錢，唔靠男人。事後我都諗番成件事係鹵莽同衝動，我承諾唔會再做傻事，唔會再令大家擔心。」
返武館打鼓
Grace又話每次工作都好努力工作，尤其係登台每次做完都即刻返香港：「其實登台我自己唔係好想接，但因為大陸市場，我為咗生活要接好每一個Job，熟我嘅朋友都知我登完台就會即刻返香港，即使幾夜都好。我上次去汕頭，四個半鐘頭車上去，四個半鐘頭落返嚟，返到香港已經係朝早七八點，點解我要咁？係因為我盡可能都想車我小朋友返學，唔想佢哋咁擔心。」Grace話唔考慮搬走，但鑑於媽媽同仔仔擔心，可能會暫時同媽媽小住幾天。事後見Grace返番武館練習打拳同打鼓，見佢打得都有板有眼，似乎想繼續努力工作，希望唔受負面情緒影響。
|
鍾意就快D Share啦！
|
|
|
