歌手何雁詩之前喺社交網站撰文，自爆入行8年間有好多個月試過零收入，覺得愧對父母，到最近佢嘅歌曲得到回響，總算做出咗少少成績畀父母睇，即刻得到好多網民嘅支持同鼓勵！之後佢就再喺社交網站話：「感恩一直遇到好多愛我，幫助我，給力量我的人，上世一定做了好多好事吧。」同埋佢見到《東網》報道佢呢篇文章，都特意聯絡《東網》記者致謝，仲話佢媽咪睇到《東網》為佢剪輯嘅片段後，都覺得好感動！
賺到錢即請阿媽去旅行
事後何雁詩接受《東網》嘅電話訪問，佢話會寫呢篇文係因為覺得對唔住父母，佢爸爸今年66歲，仲要辛苦工作，但作為女嘅佢就一啲都幫唔到手。講到零收入嘅日子，佢就話當時會少啲出街，不過最主要都係靠家人經濟上嘅支持：「我咁耐以嚟都冇畀過家用，但佢哋唔會怨，我阿媽仲會主動問我夠唔夠錢使，幾多錢都肯畀我，所以到我有番少少收入嘅時候，都好想回饋番佢哋，之前我賺到萬幾蚊，都請咗阿媽去福岡旅行，筆錢即刻清晒，希望之後有機會可以請埋阿爸食飯同去旅行。」
遲交租要陳瀅墊支
而之前何雁詩喺拍《四個女仔三個Bar》嘅時候同陳瀅、陳凱琳（Grace）做咗好朋友，佢都好多謝呢班好姐妹嘅幫忙，好似佢2015年同陳瀅夾份租屋一年，佢曾經有幾個月要遲交租，令陳瀅要頂埋佢筆數，但對方都毫無怨言：「每人一個月要畀幾千蚊，我有幾個月遲咗畀，但陳瀅好好，佢從來冇追過我畀錢，我有鬆動錢就即刻畀番佢，依家我就已經返咗屋企住。」而Grace就知道佢冇咩收入去買衫，頹到唔想出活動，就主動send咗啲服裝sponsor嘅聯絡資料畀佢。
被質疑忍唔住喊
不過其實何雁詩本身家境唔錯，問到佢喺社交網度呻零收入，驚唔驚畀人話佢無病呻吟？何雁詩就話都有諗過呢個問題，但覺得錢唔係重點：「如果屋企養唔到我，我已經無辦法喺度生存咁多年，錢唔係重點，只係我本來出道係做歌手，中途係唔想拍劇嘅，因為唔識嘛，之後冇收入就去試吓，好彩啲拍攝機會唔錯，但其實到呢刻我都係想做歌手，我係覺得有啲目標唔係得一條路，而係需要慢慢去鋪排嘅。」又話自己係2014樂壇新人，出過一隻碟但冇咩反應，之後簽咗星夢，都冇諗過可以出到好多歌，到出咗劇集《EU超時任務》嘅插曲《最真心一對》，好多人唱呢首歌，但就有人同佢講話唔係佢嘅功勞，令佢覺得有hard feeling：「我係人哋面前好似好strong，但一上到車就忍唔住喊，我好贊成佢講嘅嘢，所以都好hurt，就覺得自己要更加爭氣。」
何雁詩profile
姓名：何雁詩
年齡：1992年11月2日（24歲）
入行經過：曾是香港高爾夫球隊代表的何雁詩，早年代表香港出戰廣州亞運會，2009年參加第一屆《超級巨聲》正式入行，其後演出多套無綫劇，2015年與陳凱琳及陳瀅等人合演劇集《四個女仔三個BAR》後成功彈出。
作品：無綫電視劇《食為奴》、《四個女仔三個BAR》、《致命復活》及《味想天開》等。
獎項：《新城勁爆頒獎禮2014》「新城勁爆新登場女歌手金獎」、《第三十七屆十大中文金曲頒獎禮》「最有前途新人獎銅獎」、《2016年度勁歌金曲頒獎典禮》「勁歌金曲獎」及「傑出表現獎」。
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|