老人家買保險，留低嘅，可能都係一份心意。金牌編劇再度離開無綫，留低嘅，其實係一份心意。無綫節目發展分部助理總監（處境喜劇）邵麗瓊，18歲加入無綫做編劇，三十多年來曾四度離開無綫又回巢，劇集包括《他來自江湖》、《創世紀》、《畢打自己人》、《天天天晴》、《誰家灶頭無煙火》及《愛．回家》；又曾涉足影圈，精采作品無數，包括《審死官》，《東方三俠》及《長江7號》等等。《愛．回家之八時入席》，係邵麗瓊喺無綫最後一部作品(應該係)，入席有時，離席亦有時。全長200集以電視台為背景的《八時入席》，將「TVI」呢個「大家庭」，剝皮拆骨，將真面目展示於觀眾面前。當高層信誓旦旦擘大眼話無綫冇派系鬥爭之際，《八時入席》就將一眾監製權鬥各部門互相推莊交波大跳職場卸膊操真實一面展現出嚟——其實以上種種，又何嘗唔係辦公室日常？噚晚《八時入席》終於大結局，分上下集單元名稱《開拓未來的路》，有指呢兩集，係邵麗瓊送俾TVB最後的禮物，講述得寵嘅綜藝科同戲劇組待遇有幾唔同，綜藝科資源足可以乜嘢都開公數，戲劇組就咁多年都係得$18買飯盒樣樣慳住用。至於各路監製就各家自掃門前雪，出咗事就交波。舉例藝員塊面皮膚敏感，梳化服互相交波推卸責任；一方有難，個個都話之你，最緊要顧掂自己，心態係唔好益人、唔好拿屎上身，唔好幫人抬橋，金句如：
「吃力不討好嘅嘢，係傻仔先至做㗎咋！」
「你千祈千祈唔好接呢個波，你咁好心做乜嘢？套劇掂咗，戲劇組就坐大，搶埋我哋綜藝科啲資源。所以你應該蹺埋手，棺材舖裝香，望人死！」一家不團結各懷鬼胎的公司，是否無綫真實寫照？咁點解時生對戲劇組咁harsh？因為佢哋唔識計數，粗心大意，四個人食飯嘅場面動輒買廿幾個飯盒擺喺度嘥，浪費公司資源。時生怒吼:「做嘢唔求其嘅人好少！加飯錢俾佢哋？(依家係$18)你叫嗰班導演助導浪費少啲公司嘅錢先同我講」好明顯，邵麗瓊沒有一味只係槍口對住綜藝科。Dina姐趕唔起拍大製作《木棉花》嘅製作特輯，戲劇組同綜藝科都食花生，最後由邦主黎耀祥接班人十仔(馬貫東)憑住「有信心」同「慳住使／應使則使」搞掂。人哋話起碼成本要五百萬嘅特輯，佢用百幾萬就搞掂。邵麗瓊想帶出嘅係，一間公司，各個部門、老闆同下屬，關係都係雙向。員工唔係慳住使就叫做盡責，而係應該用個heart去做，應使則使；老闆要知人善任，做得好要獎勵，如加人工。講番邦主呢個角色設定，佢係綜藝科最大，而綜藝科power又於戲劇組之上………第199集毛舜筠對住感歎公司上下流行卸膊文化嘅邦主，講咗呢幾句發人深省嘅說話：「你嗰個年代嘅開國功臣係點我就唔知，但係由五年前，我入嚟TVI第一日開始，呢度就已經充滿住卸膊文化。」五年前，剛巧就係非戲劇製作助理總經理余詠珊入主無綫之年。講開呢兩集，黎耀祥喺劇中不斷扮演偷聽者，唔知點解成日去到邊(包括廁所同Canteen)，都咁啱偷聽到人講嘢……張揚的竊聽者，無綫劇集常勝方程式，好似《致命復活》咁，誇張到後嚟幾乎集集都有偷聽添。唔知邵麗瓊呢份心意，無綫收唔收到？
|
鍾意就快D Share啦！
|
|
|
