黎明中環海濱騷
16000人捱冷狂呼
天王黎明（Leon）昨晚在中環海濱活動空間舉行「Leon's Penguins in Live 香港演唱會」，因為場地不設劃位，所以早在前日已有fans冒雨及寒冷，在場外露宿等入場。昨日4時許開始入場，雖然16,000人要在攝氏12度的氣溫下捱冷睇騷，不過當黎明和嘉賓鄭秀文出場時，全場即起哄狂呼。
黎明昨晚在中環海濱開騷，以一身橙色外套sharp爆登場。
黎明只此一場的露天演唱會，昨晚在中環海濱活動空間舉行，因不設劃位，所以有香港女fans早於前日已經在場外露宿，務求霸頭位入場。昨午未夠3時許在VIP區已有近300人排隊，他們分別來自中國、韓國及英國等地，當中以女fans居多，不少戴着企鵝帽造勢。
黎明有性感兔女郎傍實跳舞。
黎明向台下觀眾送企鵝公仔。
黎明的舞台延伸到最後一區的觀眾。
雖然昨晚天氣寒冷，場內16,000歌迷表現熱情。
過兩關卡
場內設有16,000企位及約30個VVIP包廂，並有演唱會紀念品出售，包括帽、T恤及風褸等，價錢由50元至600元不等，其中以黎明穿過的同款風褸最搶手，亦有酒精飲品及中西美食發售，有如嘉年華會。
大會在下午4時15分讓觀眾進場，雖然入場檢查比較嚴謹，要過兩重關卡，除檢查每位進場人士的隨身物品，確保摺凳不帶入場，及後更要核對身份證及barcode，但秩序大致良好，約15至20分鐘便可入到場內。甘比帶着囝囝劉仲學到場，李彩華則與男友何遠恒現身，何遠恒笑言經常唱黎明的首本名曲《對不起我愛你》給女友聽，其他捧場名人還有岑杏賢、陳小春、謝天華、莊思敏和莊思明等。
晚上8時，演唱會總監雷頌德在台上宣佈演唱會於半小時後開始，搭正8時半開騷，有市民隔着欄杆欣賞，場內亦有後排觀眾投訴看不到。黎明戴着墨鏡及發光超大皇冠，穿上花碌碌的舞衣出場，非常搶眼。他先唱出《一比一》，之後一直步出伸延至觀眾席的舞台大跳勁舞，歌迷即嗌到拆天。
甘比帶囝囝（中）到場，小朋友見到鏡頭興奮揮手。
再爆金句
昨晚氣溫降至12度，黎明跟捱冷的觀眾打招呼：「大家好，唔凍吖嘛？喺過往嘅日子，唔同地方我都開過演唱會，難得你哋今次應承我，可以企埋一齊睇演唱會，多謝你哋，後面嘅朋友唔需要擔心，我會好快速間歇性咁出嚟，間歇性可快可慢嘅。我剪咗個短髮，精神咗。」坐言起行的黎明之後很努力行去不同區域，跟觀眾打招呼。
在唱《Ba Ba》之前，雷頌德在控制台上大爆黎明諗咗好多方法𠱁大家開心，他說：「呢首歌，係Leon第一次搵我粉墨登場獻唱，陣間Leon會送出兩大桶限量版粉紅色企鵝畀大家，佢會慢慢行，因為個台其實好長，好似中環行去金鐘咁遠。」到中段演唱會嘉賓鄭秀文登場，全場觀眾即時起哄尖叫，她唱出《信者得愛》，跟着在台上跟黎明傾一輪。
採訪：王連連
攝影：陳俊強、仇志德
|
鍾意就快D Share啦！
|
|
|
