熱爆娛樂: 【20%興趣都冇】「鼎李滷味」開唔成鼎爺鬧李錦聯黐線：佢抽我水 _

2017年2月4日星期六

【20%興趣都冇】「鼎李滷味」開唔成鼎爺鬧李錦聯黐線：佢抽我水 __,李錦聯,李家鼎,鼎爺,

其他影片：>>

鼎爺李家鼎套《阿爺廚房》，集集都盡顯功架，連教咗煮餸幾十年嘅方太，都話要向佢偷師，就知道鼎爺有幾威水。而之前喺大台都係教煮餸嘅李錦聯，都話過如果要同鼎爺合作，仲可以賣滷味同燒味，咁間舖就食埋字，個名會叫「鼎李滷味」。（新聞連結： http://bit.ly/2jJANg4 ）今日鼎爺同金剛去到屯門V City出席新春活動，當然有繼續露兩手「撈起」，講到日前李錦聯話開番間「鼎李滷味」，鼎爺即刻擘大對眼、七情上面咁話：「黐線啦，佢抽我水，我又唔知咩事，突然間咁樣爆出嚟，我唔鍾意。兩個加埋都百幾歲，話佢又唔好意思。搞笑、gag無所謂，不過我唔知呀嘛，有共識就冇問題。」咁鼎爺有冇同李錦聯聯絡呢？鼎爺話：「過咗去啦，我有話佢『有冇搞錯呀？』佢自己都話係抽我水，唔講都講咗啦。」鼎爺仲嬲嬲地咁講起上次佢同李錦聯拍廣告嘅事：「都係3日前嘅事之嘛，佢突然間埋嚟講恭喜發財，問我影咗相得唔得，原本影張相無所謂，點知搞出個『鼎李滷味』喎，我真係『鼎佢滷味』呀！」至於有冇興趣開食肆？鼎爺就笑謂：「何來巨款？唔會啦，好多人搵我合作，我冇答應，如果自己搞，真係20%興趣都冇，好大壓力㗎，賺咗又辛苦，蝕咗就PK啦。」

鼎爺話李錦聯有心抽佢水，令佢嬲嬲豬。（攝影：陳俊強）	鼎爺呢排真係好紅，新年活動又見佢份。
不過台下訪問講起李錦聯，就七情上面。	睇樣，就知佢俾人擺上枱好不滿。	好嬲咁講：「我真係『鼎佢滷味』呀！」
	如果真係開食肆，鼎爺話辛苦。	李錦聯之前話想同鼎爺開食肆。（資料圖片）