近期大台劇《乘勝狙擊》入面灑鹽花，之前幾集已經不斷有陳山聰同莊思敏嘅床戰片段，睇完嘅觀眾都要講番句「令人好不安呀」。（新聞連結： http://bit.ly/2kw5Taz ）點知呢啲鹽花原來未灑完，噚日播出嗰集，明明係傅嘉莉同朋友喺海邊訴苦，點知突然殺出陳山聰同莊思敏，仲要突然激咀，嗌完兩句交，又再次返咗酒店繼續肉搏，如果唔係黃子雄突然出現，觀眾又要睇多次佢哋賣肉……個角色咁「大食」，陳山聰係咪好享受呢？佢噚日回覆傳媒時話：「作爲演員盡量配合劇本，佢哋或者想呢幾集劇情有一啲變化，不過放心，所有激情場囗已經完結，生理反應真係唔會有，電視尺度點到即止。」噚晚一集嘅重點，其實喺呂珊度，佢明明就落藥綁架咗陳秀珠，但就好似大把時間咁聽陳秀珠講番件事，真係要就嚟死都講番個原因出嚟。以往多數都係奸人講點解殺人，但今次就調返轉，係被害人解釋，而奸人就要慢慢聽，為咗令到件事冇咁突兀，今次《乘勝狙擊》就多咗個新玩法，一心要殺人嘅呂珊，無啦啦拎咗盆水出嚟，原來係想磨刀，連磨刀石都準備好，話要磨利把刀殺陳秀珠，等佢有時間慢慢講。至於心急搵番陳秀珠嘅單立文（豹哥），就捉咗有傷在身嘅陳展鵬同林夏薇返香港，不過明明係要救人，豹哥竟然三番四次咁企定定同陳展鵬講大道理同回憶往事，好似陳展鵬叫豹哥丟咗支槍，同埋吳岱融當年係點跌落海等等，真係等你救都蚊瞓。而陳展鵬明明係中槍入院嘅，返到香港行得走得，最有趣係喺室內地方就要㩒住心口扮痛，出到去郊外就精神奕奕，其中有一幕仲好似約埋豹哥一齊行山咁。另外，返到香港無耐就俾豹哥打暈咗嘅林夏薇，噚日回覆傳媒話老公之前都有追開佢嘅劇：「不過最近唔喺香港就要返去一齊追番，因為劇情好緊張，身邊好多朋友都追。」
| 噚日一集《乘勝狙擊》終於有啲新意，用磨刀嚟拖延下時間。（電視圖片） | | |
| | | |
| | | |
| | | |
| | | |
| | |
|
鍾意就快D Share啦！
|
|
|
