成軍31年繼續達明一派
阿達受明哥牽連 豁達一生無悔
【《蘋果》專訪】回望去，無後悔，奮鬥已學會！在香港成立了31年的達明一派，經歷過拆夥、重組、又拆夥，下月因開紀念騷再走在一起繼續追尋，劉以達笑黃耀明越老越開懷，明哥就笑阿達越來越肥；由於黃耀明的政治立場，令演唱會受到零贊助、海報被下架重重波折，明哥為連累隊友感抱歉，阿達卻豁達說：「我哋覺得做咗達明一派，我哋呢一生都無悔！」
達明一派日前在中環街頭重拍三十年前的宣傳相，黃耀明（左）笑拍檔劉以達越來越肥。攝影：周樂恒
長髮黃耀明和短髮劉以達31年前組成達明一派，由於形象鮮明加上歌曲前衞，《今天應該很高興》、《石頭記》、《禁色》及《忘記他是她》hit足多年，當年曾傳兩人不和拆夥，之後又重組再拆夥，現兩人為下月23至25日假紅館舉行的「達明一派卅一派對」再坐埋一枱，他們日前在中環接受本報專訪，更坐街頭重影30年前的宣傳相，身形不復當年瘦的阿達自嘲：「都幾得意，但辛苦啲，又蹺腳又蹺手。」
「迎難而上」
明哥因撐雨傘運動，不但令演唱會零贊助，出現在海報上的台灣天王周杰倫，因擔心影響內地市場而反映想海報下架，今次達明開騷日子偏又撞正特首選舉周，似乎政治找上了達明！明哥說：「其實2012年達明一派演唱會都係同社會好緊扣，唔知點解政府畀呢個期我哋，哈哈！唔係我哋特登揀，避都避唔切，所以係天注定，我哋迎難而上。」
對於演唱會沒贊助，明哥對阿達說：「唔好意思，害咗佢，原本冇人敢掂我啫，我最近傾緊一個同廣告有關嘅嘢，最後都係冇咗，因為我嘅身份，霸權建制夾手夾腳要你封嘴，我覺得係好恐怖趨勢。」阿達卻說：「我哋預咗，達明一派本身冇計，佢都話害咗我，但自己個人暫時未有影響。佢做嘅嘢係啱，冇所謂。我哋覺得做咗達明一派，我哋呢一生都無悔！」
推出30周年唱片的達明，刻意用當年的舊相做封套。
達明當年形象前衞，歌曲《今天應該很高興》及《禁色》等大受年輕人歡迎。資料圖片
用音樂溝通
達明以前曾傳不和，究竟兩人是否老友鬼鬼？阿達說：「基本上我哋用音樂溝通，有習慣一年出嚟一兩次飲嘢或食飯。」通常焦點放明哥身上，阿達會否感到被冷落？阿達說：「唔會，佢講晒，我咪可以飲吓嘢先。」明哥笑說：「最緊要夢遺大師一出，焦點就去晒佢嗰度，所以唔使驚。」
問到相識30多年，覺得對方最大改變是甚麼？阿達說：「明哥越嚟越開心，唔係話佢以前唔開心，只不過做人開懷咗，可能老佢一直以嚟衣着方面都係講究，由我識佢到𠵱家都係冇變。」明哥就說：「我覺得佢有段時間冇咁開心，佢𠵱家開心好多，我諗同佢信仰有關，放開咗，對我嚟講佢係冇乜大變，只係體重變咗。」
採訪：余燕儀、余傲芝、馮國康
攝影：周樂恒、郭賢興、馮峰、Neo
化妝：Vanessa Wong
髮型：Ivan lee of Headquarters
場地提供：Jinjuu of蘭桂坊
下月達明在紅館開紀念騷，宣傳海報卻被周杰倫反映想下架。
阿達（左）坦言不介意多年來焦點放明哥身上，反指自己安於沉默。
86年出道的達明一派，選擇了一條偏鋒的電子音樂路。
明哥說達哥三十年如一日，除體重以外；達哥則說明哥做人開懷了不少，但對衣著從來都非常講究。
達哥不介意鎂光燈常落在明哥身上，還笑言「佢講晒，我咪可以飲吓嘢囉」
事隔30年再做同一個pose，都沒太大難度
曾經是前衛先鋒的代表，到今天追求的是思想與價值觀的前衛
下月23至25日就舉辦《達明卅一派對》演唱會，但之前因政治敏感下架以及沒有品牌願意贊助，可謂一波三折
「我們再去做任何嘢都唔係為證明乜嘢，大家唔再覺得我哋前衛同受歡迎，冇咩所謂，我們自己覺得好玩就夠」
|
鍾意就快D Share啦！
|
|
|
