【新增短片】特首參選人、政務司前司長林鄭月娥日前接受now新聞台專訪時，不點名批評另一參選人、財政司前司長曾俊華拒答4名被司法覆核議員資格的議員提問，斥對方做法破壞行政立法關係。曾俊華傍晚出席拉票活動後，被傳媒問及此事時，踢爆林鄭曾兩度去信立法會主席，表明官員會拒答這些議員問題，他曾詢問律政司應否拒答，林鄭亦應知情，但當他拒答後，林鄭即轉軚，暗示被林鄭「跣」。被問到會否覺得林鄭藉此事「抹黑」他，曾俊華著記者自行判斷，僅稱「呢個就係嗰個事嘅事實」。曾俊華憶述事發前三日，政府在黃昏時表示將司法覆核4名議員資格，之前林鄭月娥曾2次去信立法會主席，清楚表明政府立場，即是官員不會回答某一類議員問題，「呢個係我哋當時嘅政策，呢個政策係清楚嘅」。曾俊華續指，由於三日後要出席立法會委員會，可能是首位官員回應答問，故翌日要求律政司再澄清相關法律立場，「當時我哋好多嗰啲來往資料，都去咗Carrie個office嗰度，所以佢（林鄭）應該都知悉嗰個事情」。最終他出席立法會說出政府立場，引來議員很大意見，但當日下午議員會見林鄭時，「Carrie就將我哋以往嗰個政策改變咗，就話我哋會回答呢啲議員嘅問題」。曾俊華指，尊重林鄭有關改變和決定，之後亦跟隨有關政策行事，「所以呢個係整個政策上改變嚟，唔係啲乜嘢特別事情」。被問到是否覺得林鄭藉事件「抹黑」自己時，曾俊華只說：「呢個就係嗰個事嘅事實，你哋自己判斷啦」，就轉身離開。
|
鍾意就快D Share啦！
|
|
|
