30歲歌手菊梓喬（Hana）曾自爆兒時要和胞妹共食一包即食麵「頂肚餓」，加入樂壇後仍零收入要靠妹妹支持生活費，每日只得廿蚊伙食費，不過她加盟星夢唱片公司不夠一個月，除被公司視為待生產中要休息的師姐吳若希（Jinny）接班人，更獲點名唱一周播足五晚的無綫外購劇《錦繡未央》主題曲《一輩子守候》，擺明行師姐唱「洗腦歌」之成名路。
着比堅尼晒日光浴
近日Hana變得好「富貴」，去完日本8日後，再到泰國入住5星級酒店豪玩豪食，又穿上三點式泳衣在酒店泳池享受日光浴晒玉背，人生可謂「坎坷過後有運行」。
阿妹墊支
Hana接受東網電話訪問時，仍呻窮困，表示尚未還墊支經理人公司的六位數字，問她為何仍有錢去旅行歎世界，她指兩個trip全是免費：「入行後年幾冇放過假，所以同阿妹去日本8日玩吓啫。（旅費好貴喎？）都係阿妹墊支住先，兩個人使咗2萬蚊到，去咗京都、大阪同秋葉原睇電玩，東京太貴唔敢去，我哋都係食火車飯盒，食啲平嘢。」
老闆再請去泰國
至於泰國之旅則是經理人老闆免費請她去，她又說：「係獎勵我之前喺頒獎禮度攞咗獎。」最開心是多年沒有人追，現單身的她有艷遇，竟有兩名韓國型男主動幫她影相外又相約夜蒲，問可有留下聯絡發展異地情緣？她說：「因為我要返香港，所以失約。」
唔敢再睇留言
星夢娛樂唱片公司高層何哲圖接受電話訪問時，大讚Hana「冇得頂」：「個人有經歷，令Hana好有鬥心，佢嗰團火幫到佢上位。（取代Jinny？）係可造之材！（有做一姐潛質？）指日可待啦。」Hana對何哲圖指有機會取代Jinny？她表示怕怕說：「我嗰團火喺音樂度，冇諗過要同邊個鬥，我係和平愛好者，況且最近好多人喺網上留言鬧我，話我唔可以取代師姐，搞到我唔敢再睇留言。」
唱歌被批感不快
最令她不快是被批評歌及作品都差，及指她廣東話咬字不正誤會她是內地人，她解釋：「我係香港人，只係講嘢有懶音啫。（會改嗎？）如果唱錯咗字會改，周杰倫唱歌咬字都唔準啦，呢啲係個人風格，唔會改。」至於有機會唱「洗腦歌」《一輩子守候》，且在其唱片公司的YouTube上架一周就有十幾萬點擊，她感恩說：「啲人都話首歌聽一次就會記得囉，我覺得好開心。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
