40歲嘅陳展鵬，同26歲嘅去屆落選港姐單文柔日前摸黑揸車上山頂嘆外賣兼談心，戀情曝光。事後陳展鵬急急解畫，稱自己單身未婚，同胡定欣亦絕對唔係拍拖，又指單文柔只係佢個Stylist，仲係免費嗰隻，幫咗佢半年。最緊要係呢句：「當晚真係乜嘢事都冇發生，所以咪咁囉！」(新聞連結: http://bit.ly/2mPlMHN )噚日一早，陳展鵬出發去北京準備拍無綫劇《天命》，重申同單文柔只係朋友關係，又話為自己得番兩日時間就要北上開工，所以單文柔趕住幫佢揀布料睇衫for陳生大陸登台時用。咁陳展鵬既然頭已剃仲入埋劇組，邊有可能獲無綫放人俾你登台？呢樣都唔提，關鍵係陳展鵬再次主動澄清當晚車上冇發生任何事——講白啲，即係冇車震。女仔名節重要，更重要係，單文柔因為同陳展鵬嘅戀情，唔止俾高層樂易玲「照X-Ray」，就連之前安排佢加入兒童節目，都分分鐘嗌停，仲有唔少陳展鵬fans留言，鬧爆單文柔。據知呢，陳展鵬對住傳媒就否認戀情，但其實佢一早已經向無綫承認戀情，仲向樂易玲拍晒心口表明將一力承擔:「成件事等我自己處理，我有分數。有乜嘢事，我一力承擔。」樂小姐聽到佢咁講，都冇晒法子。陳生貴為視帝，依家無綫正值用人之急嘛。又係據知啦，陳展鵬同單文柔確實已拍拖一段日子，陳展鵬仲學足容祖兒，用飛行里數為單文柔換咗張商務機票，女友就向公司請定假、諗住飛去北京陪男友，點知俾本報影到晒暗黑拍拖，先至無奈承認。單文柔家陣腹背受敵，亦分分鐘影響星途，所以man爆嘅陳展鵬除咗自己孭晒上身話獨力承擔之外，仲安撫女友，叫佢唔好擔心，總之有乜嘢事，佢會拆掂。為免越講越多是非，所以陳展鵬都有提醒女友唔好回應，ig都唔更新住。難得有個咁man又肯承擔嘅男朋友，令曾受感情重創嘅單文柔(詳見另文)對陳展鵬愛得死心塌地，乖乖聽話，一齊好好保護呢段萌芽中的愛情。曾經喺選港姐時是非纏身嘅單文柔，本身都係乖乖女嚟嘅，亦都真係想做陳展鵬背後女人，自是配合。而陳生就覺得自己今次危機處理得好好，諗好晒應對。唔知大家俾幾多分佢呢？
|
鍾意就快D Share啦！
|
|
|
